سلام الله عليكم حبيباتي
ليوم جبتلكم قاطو يقولو des Carrés à l'orange او مربعات البرتقال
قاطو منقدرش نوصفلكم شحال بنين
بهذي المقادير تخدملكم 80حبة او اكثر
نخليكم مع الوصفة (جزائرية) انا هنا درت ربع الكمية غير باه نوريلم بصح نعطيكم الكمية كامل واذا حبيتوا تنقصوا اقسمو المقادير
500 غ زبدة من الاحسن صول.250 غ سكر ناعم .3 بيضات .2 صفار بيض. قشور برتقال.ونلموا بالفرينة وحد -1كغ-
ملاحظة-الخميرة منديروهاش في العجينة نديروها غير في الحشو-
الصور توضح اكثر
تتحصلوا على عجينة لينة وشادة روحها
نروحو للحشو
2 كيلات نواة كوكو من المستحن نود كوكو الاصفر واذا مكاش معليش استعملي العادي.كيلة سكر ناعم.و2كيسان عصير برتقال. باكي خميرة ونلموالحشو بالبيض -متكثريش البيض غير تتلم خلاص-
نحتاجومعجون برتقال اذا مكاش معجون مشماش-انا نحب المشماش خير-
للطلية .700 سكر ناعم مرجان-3ملاعق كبار عصير ليمون-3 ملاعق كبار ماء من مستحسن معدني يعطي لمعة.بياض بيضة-2 ملاعق كبار ماء الزهر و ملعقة زيت نخلطهم كلشي نتحصل على كلاصاج تاعنا
للتزين .عجينة السكر وملون اخضر وبرتقالي
الصور توضح
الحشو
وفي مول كيما هكا
ندير طبقة من العجينة
ثم نص ملعقة صغيرة معجون
ثم نغطيهم بالحشو ونضغط عليه براحة اليد
هنا كملت دخلتهم للفور كيطيبوا من لتحت شعلي من فوق راهم ميدوش بزاف وقت
كيطيبوا نخلوهم يبردوا ونغطس كل حبة في الكلاصاج غير من فوق ماشي كامل
ونحوا شوية قلاصاج نلونوا بالملون البرتقالي ونخدم دي تري او خطوط بجنب او على الحبة كامل انتي وذوقك وبعجينة التزين اما ندير ورود برتقالية واوراق خضراء ونزين بيهم او نخدم كرية صغيرة وبالكوردو نشكل خط في الوسط ونثقبها ثقوب صغيرة تولي تبان حبة برتقال
ان شاء الله تنال اعجابكم وتجربوها والله ذوق رااااااااائع ربي يقدرلكم المناسبات السعيدة وتخدموا من حلوياتي
وادعولي ربي يشافيني ونرفد بيبي وتكون عندي مناسبة سعيدة باه نخدم انا تاني قاطو على جالها
غدوة اذا كونا من الحيين ندرلكم قاطو بديكووووووووووور هايل
احبكم في الله
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©
رد مع اقتباس
