السلام عليكم ورحمة الله وبركاته




اخوانى الكرام

اكيد البعض منا استلم حوالات ويستريونيون من وقت قريب ولاحظنا وجود استمارة بيضاء

مطلوب منك فيها انك تكتب

الاسم وده عادى من حقهم

ورقم بطاقة الرقم القومى وده كمان عادى ومدينتك مفيش مشكلة

لكن الغريب ان بقية الاستمارة مطلوب منك فيها

رقم الدور !!! رقم الشقة !!!! عنوان عملك !!! رقم تليفون العمل !!! انت متزوج ؟؟

بتعول ؟؟؟ بتستخدم الخدمة كل اد ايه اسبوعيا ولا شهريا ولا دوريا ؟؟؟!!!!!!!

يعنى ويستريونيون يا جماعة مش باقى الا انه يعرف بتكون موجود فى بيتك الساعة كم بالظبط

طبعا لا يخفى على الجميع الظروف اللى احنا فيها ووجود جهه مثل ويستريونيون بتطلب منك البيانات دى وهى مش من حقهم ولا من حق حد دى حاجة غريبة وعجيبة ومريبة جدااا

عن نفسى لما سألنى الموظف بكل برود

حضرتك ليه مش مكملة البيانات بتاعتك

قلت له بنفس البرود لان حضرتك مش من حقك تعرف رقم الدور ولا رقم شقتى ولا عنوان شغلى
ولا رقم تليفون شغلى

ولما رد وقالى انا اقدر اعرف من قاعدة البيانات عندى حضرتك بتيجى تستلمى كام وكل اد ايه

قلتله حضرتك متهمنيش انك تعرف ولا لا لكن يهمنى ورق رسمى زى ده مكتوب فيه كل حاجة عنى

وانا اكون ماضية عليه

فرد وقالى يعنى لو انا روحت عنوان حضرتك اللى فى البطاقة وسألت على شقتك مش هعرف مكانها

قلتله لو كلنا رفضنا نكتب الاستمارة دى حضرتك ممكن تروح تسأل على شقة واحد واحد فينا لو ده يلزمك

فرد وقالى انا مش فاهم حضرتك ليه متضايقة من الاستمارة دى مع ان مفيهاش أى حاجة

قلتله لو حضرتك مش فاهم ليه الجهة اللى انت شغال فيها طالبه البيانات دى ليه يبقا دى مشكلتك انت مش مشكلتى

لو انا مطلوبة فى تحقيق فى قضية مش هيطلبوا منى البيانات اللى انتوا طالبينها دى

لو انا راحة أعمل محضر مش هيطلبوا منى البيانات دى

حضرتك بتطلبها بأى صفة ولا بأى حق

فى الاخر لما زهق منى قالى خلاص حضرتك ولا تزعلى نفسك هى مش اجبارية !!!!!

قلتله لما هى مش اجبارية ليه مدبسينها فى الورقة الصفرا اللى بنحط فيها بيانات الراسل

ولا بتعرفوا الناس انكم يا اما تحطوا بياناتكم يا اما مش هتستلموا فلوسكم اللى انتوا بالفعل واخدين عليها حقكم مسبقا

ولما هى مش اجبارية ليه مش كاتبين فى اول الاستمارة ان الاجابة اختياااارى ؟؟؟؟؟؟؟؟؟؟؟

ولما هى مش اجبارية بتسألنى ليه مكملتيش بياناتك ؟؟؟؟؟؟؟؟؟؟؟؟؟

اسمحلى حضرتك انا مش هسكت وهوصل صوتى لكل الناس مش من حقكم تعرفوا البيانات دى عن اى حد وهحول الموضوع ان شاء الله لرأى عااام

فبرجاء من الجميع الانتباه وعدم اعطاء بياناتك الشخصية جدااا لاى حد مش من حقه يعرفها

احنا مش عارفين ليه ويستريونيون عاوزة تعرف رقم الدور اللى احنا ساكنين فيه

ولا رقم الشقة

ولا ليه عاوزة تعرف عناوين اشغالنا ولا ارقام تليفوناتها

ولا ليه عاوزة تعرف دخلنا الشهرى كم ولا متزوجين ولا عندنا ولاد ولا لا

ولا يمكن الاستمارات دى مش راحة اصلا ويستريونيون وراحة لجهه تانية خاااالص ؟؟؟

ولا ايه رايكم ؟؟؟؟






©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©