كعك ومعمول سويته عن روح حماتي ...وحبيب قلبي طارق الله يرحمهم




صباح....مساء الخير صبايا كيفكم جميعا...
اليوم موضوعي راح يكون شرح طريقة تحضير المعمول والكعك عطريقتي طبعا
احنادائما المعروف عنا واعتقد عند الجميع انه بعيد رمضان وعيد الاضحى
منعمل فيهم كعك ومعمول ضيافة العيد ..اكيد مع الشوكولا
والقهوه الساده ...
وبما انه السنه هي فقدنا عزيزين كتير غالين عقلوبنا
حماتي وطارق الله يرحمهم
حماتي قبل عيد رمضان بشهرين وطارق قبل عيد الاضحي
بايام قليله اكيد ما كان النا نفس نعمل كعك ومعمول
وضيافة العيد الشوكولا ...حتى انه ما عيدنا زي الناس
ما كان النا نفس وكانت الضيافه تمر وقهوه ساده...
وحبيت انا اعمل من يومين كعك ومعمول وافرقه
عن ارواحهم للاهل والاحباب ...
وعملت وطلعوا طيبين كتير وسويته على نية اني افرقه
وفعلا الحمدله فرقته عن روح سيدنا
محمد صلى الله عليه وسلم
عن ارواحهم وارواح المسلمين جميعا
وهي العباره اللي بقولها وانا بجهز الخلطه لما انوي تفريقه
عن روح اي احد ...
من اهل الدنيا لاهل الدار الاخره عن روح سيدنا محمد
عليه الصلاة والسلام وعن روح فلان ابن فلان
واقرء الفاتحه وان شاءالله توصلهم يارب عفكره انا بس
اعمل عن روح ابني كمان نفس الشي وصدقوني
بحلم بابني بفرق معي كمان وياكل منه
هذا بدل عن انه الصدقه ان شاءالله توصل ....
اعذروني طولت عليكم .....
اكيد كلكم تعرفوا شرح طريقة الكعك والمعمول ...وطريقتي هيه..
المكونات
سميد ناعم رطلين سمنه علبه كامله استعملت سمنة البلقاء
نكهتها حلوه كتير بالكعك وزبده تركيه 2كيلو ومسكه
ومحلب وحواجة الكعك وعجوه مطحونه وفستق حلبي
وقطر وسكر ناعم ..خميره للعجن وحليب

الطريقه....
اولاشيء بدوب الزبده والسمنه وبديرها بس تسخن على
السميد وبطحن المسكه والمحلب مع بعض وبضيفهم
ايضا عالسميد وبعدين بفركهم بايدي مع بعض بشرح طريقة
البس ببسهم كويس كتير وبتركهم يوم او اكتر حتى يتشرب
السميد السمنه والزبده ...
وبس ابلش اعمل فيهم باخد كميات قليله وبعجنها بالخميره
والحليب شوي شوي وبتركها تخمر العجوه بضيف لعجنتها
حواجة الكعك اما الفستق حلبي ما بضيف شي اله
طبعا انا بكون خالطه العجوه مع حواجة الكعك وزيت زيتون
وجوزة الطيب وقرفه وبكورها بشكل دوائر عشان تسهل الحشي
والفستق حلبي بطحنه وبنقعه بالقطر وبضيف عليه ماء الزهر
وبصفيه بعد فتره بتركه بالقطر فتره كبيره
وببلش احشي فيهم وبصفهم بصدر بعد حشيهم
وبعدين ببلش بس ينشفوا شوي احط الفستق الحلبي
بقالب صغير ...والعجوه بحب انقشها بملقط كلها بايدي
وبعدين بصفهم بالصواني وبتركهم يتحمروا
على نهار هاديه بالفرن وبس يبلشوا يسير لونهم شوي
ذهبي بطلعهم وبصفهم بصينيه كبيره وبدير عليهم
السكر الناعم وطلعوا كتير طيبين وصحه وهنا على قلوب
اللي اكلوا وعلى قلوبكم ياريتكم قراب مني كان طعميتكم كلكم
امانه عليكم اذا عجبكم الموضوع تدعوا لحماتي الغاليه
وطارق بالرحمه وتقرئوا الفاتحه عن روحهم واروح المسلمين
وتعالوا اورجيكم الصور وان شاءالله يعجبوكم كعكاتي ومعمولاتي










موضوع مقدم من منتديات ديزاد (منتدى الحصريات)


©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©