( حلى زرعه ) مشاركتى فى أسبوع الحلويات وداريتن اني مانيب فايزتن ابد



حيى الله ربع المطبخ والله اني مشتاقتن لكم يالشينااات داريه انكم ماشتقتو لي وفرقاي عيد بس انا ناشبه لكم والظاهر ان محد معلمني الطبخ الا انتم .. بس بعد ماحب اطبخ عشان تسذا ماعاد جيتكم الظاهر اني منظوله في الطبخ هههههه !! طبعا مثل ماتشوفون دايم طبخاتي فاشله ولا احقر عمري ابد ودايم يفشلوني بس عادي قلبي بارد والبلى اني اسوي الشي لوه مازان واقوم اشهر به لاني ماطبخ الا في السنه مره واجي بازه باللي مسويتن به ولو ماكلوه بغصبهم وان بقى منه بطني يوسع بقر ..

الزبده :


مرتن من المراير وانا اشوف طبخات بناتنا هنا ماشاء الله عشان ما انظلهم لقيت ذي المسابقة قلت اشترك فيها في اسبوع الحلويات وقلت بسوي حلى بس طول وقتس وانتي ناشبه جمب الخلاط تخلطين ولا عاد والله اني داريتن ان مافي امل افوز جمب حلويات البنات ذي مير ماعليه وادخل المطبخ اسويه واليكم الطريقه اعزائي المشاهدين ..

المقادير..
5حبات جبن كيري / واحد بسكوت شاهي / واحد حليب سايل اللي تبين تبين ال ه تبين بودره تخضين لتس واحد في كاس وتدجينه شي راجع لتس / اثنين جالكسي ساده / واحد قشطه كبيره / نستله كبيره وحطو نصها موب كلها لايجيكم السكر / ثلاث جالكسي فلوتات ..

واضح من المقادير ان الحلى من جمبها بس اهم شي الطعم والطعم موب شين بس ... خلاص بتشوفون الحين وش سويت --> تسمع بالتشويق هي وخشتها ..

الطبقه الاولى ..

اول شي تجيبون علبه بسكوت الشاهي مع علبه الحليب او الحليب المخضوض على حسب الرغبه ونص كاس مويه وبياله سكر في الخلاط مثل تسذا !




هالخلاط صار محترق يوم حطيت كلش واشغله ومعيي مع العلم ان امي امس خالطه فيه مافيه الا العافيه جت علي يعني ..




قمت عوودت اكبه في الخلاط الثاني عاد هالخلاط سالفته سالفه مايخلط زين مره حوم كبدي وامي تقول زين بس البلى فيتس ..



المهم تخلطونه مره بعدين تصبونه في حقات الكريمه ههههههههههه ياانهم ضحكو علي ضحك وش اسوي ماعندنا ذيك حقت الحلى ذيك الوذيفات لا ومخليه كل واحد له واحد لحاله بيجيهم المر ..

قضينا من الطبقه الاولى نروح للثانيه ..



تحطون في الخلاط الدعوه كلها خلاطات تدهر نص علبه قشطه و2 جالكسي ساده تحطونه في حمام مائي وتخلونه يسترخي شوي لين تحطين باقي المقادير في الخلاط و4 فناجيل سكر




بعدين تحطون كل هالعفش في الخلاط وتخلونه يخلط وتصبونه على الطبقه الاولى مثل هالصوره ..



هههههههههههههههههههه ماتوقعته بيطلع كذا لان في الطريقه اللي ماخذتها من النت ماساح مره مثلي غطس ماله اي معالم الا هالنقيطه كنها حفره جحر ضب ..

الطبقه الثالثه ماصورتها لكم منعا للاحراج !! --> كل ذا موب احراج
الطبقه الثالثه والاخيره وختامها موب مسك وانا اشهد
5 حبات جبن كيري ونص علبه النستله ونص علبه القشطه في الخلاط برضو --> ليت من خلط شوشتس وفكنا من خلطاتس ..

بعدين نخلطها ونصبها طبعا الجبن الكيري حسر بي عيى يخلط لين اخر شي حامت تسبدي ومزعت فيش الخلاط وقمت اخلط الجبن اللي عيى ينخلط بالملعقه وش اسوي به عجزت وهو يخلط ومعيي ينخلط الظاهر يعاندني ..



يوم فتت فيه الفلوتات حطيته في الفريز مع الدجاج واللحم ههههههه عشان يجمد ويصير تسنه عسكريم يوم جا المغرب واطلعه لينه اسكريم واعطي امي وتاكل وتحيسب علي وتحلف وتقسم ان اطلعه وادخله في الثلاجه يفك الثلج عنه .. اهم شي الطفوريه المكسوره ولين هالحين امي مافرطت فيها ..



واخذه واحطه في ثلاجتي خاف احد يجي ياكله ولا يبقى شي منه خابره اخواني مشفح مافيه شي بالثلاجه الا ياكلونه --> واثقه ان بينوكل عمتي ..



مايمديكم ابدن ..
وخلاص قضينا خلاص توبه ماعاد اتعودها واسوي حلى بس بسوي غيره ان الله احياني برمضان بسنتر عندكم والله يعينتس علي ياوئاام انتي وبيلسان .. ايه نسيت اقول لكم يوم جو ياكلون الحلى لين بعضه فيه جبن قطيعات صغيرات والسكر يحسحس بضروستس ياربييييييه بس الله يكفلني ويتكفل بي .




هذي صديقتي بنت جيراننا اترجاها ابيها تجي تاكل معنا ومعيه تقول مايجي منتس زين بس مايمنع اني اقول لتس بقي لي يمكن اجي والقاكم مصفين الحلى تصفيه وانقهر .. على اني ماضنتيه ابد طسسسسي بس يااصديقتي واحلمي تذوقين منه ياام عشيش ..
سلملم ماوصيكم اضحكو بس بشويش
لكم ..

وعاد فوزوني خلاص
لو المركز الاخير مايخالف والا اقولكم الثالث عشان اقهر اهلي
وقيموني بعد تراه الميزان اللي يمين التوقيع

ملااااااااااااااحظة:::

اشكر طائر الوئام لأنها زينت لي الصور وحطت لي الاطارات
لأني نشبت لها قلت ابي مثل صور البنات مزينه وماقصرت لبى قلبها
موضوع مقدم من منتديات ديزاد (منتدى الحصريات)


©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©