السلام عليكم ورحمه الله وبركاته
يسعد صباحكم / مساءكم
بالخير والمسرات ..
اليوم معي لكم خبز لذيذ بمعنى الكلمه والاهم انه خفيف ..
وطريقته جديده .. وغير مألوفه منزلياً .. اما بالمخابز نشوفها ^^"
خبز الجبن ..
قبل لا بدأ بالطريقه احب انبه لبعض الأمور اللي لازم ناخذها بعين الإعتبار ..
مثل ما انتو عارفين هذا خبز .. ومن اهم عوامل نجاح الخبز وانتفاخه ( حراره الفرن )
لذلك :
1/ الفرن لازم يكون حاااااار جداً ... ويشغل قبل بوقت ..
2/ نشغل العين اللي فوق واللي تحت ..
فـ لاتجيني وحده وتشغل اللي تحت وتقول ما نجح الخبز .. او تغامر وتسويه ووحده من العيون (اما اللي فوق ولا اللي تحت) عطلانه وتقول ما انتفخ الخبز .. يعني بالعربي لازم العيون اللي فوق واللي تحت تشغلينها ع الاخر ..
3/ قبل لانفرد الخبز نتركه يتخمر شي 5 -10 دقايق
يالله نبدأ بالطريقه :
العجينه ..
كاس نصه لبن وربعه ماء وربعه زيت << وبكذا يكون عندنا كاس كامل من السوائل
اقل من فنجان سكر ناعم
ملعقه كبيرة (ممسوحه) خميره فوريه
2 كاس طحين
نخفق السوائل مع السكر ثم نضيف المواد الجافه ونعجنها عدددددددل
ثم نغطيهآ بـ منشفهـ
ونخليها تتخمر بمكان دافئ تتخمر تقريبا 30 دقيقه ..
في هالوقت هذا نجهز الحشوه ...
طبعاً الحشوه اختياري ولا انتي ملزومه انك تسوين مثل حشوتي ...
المجال مفتوح اذا بغيتي
(زعتر وزيت - جبن سائل - جبن شيدر .... الخ )
بس كـ بدايه احسن سوي الشيدر ^^
سويت حشوتين بالشيدر ( شيدر عادي - شيدر حراق )
نبدأ بحشوة الجبن الحراق :
جبن شيدر - فلفل
انا استخدم شيدر ماركه برايد (قوالب ) احب نكهتها واحسها فعلاً شيدرررر ..
نـقص من القالب جاهز جبنه << حسب ما نحتاج
وبعد ناخذ كم قرن فلفل << اموووت عليه
نقطع الفلفل صغييير .. ونبشر الجبنه ..
وبما ان الشيدر يتلصق في بعض وإحنا رح نضيف له الفلفل ..
لذلك عشان يتوزع الفلفل مع الجبن مزبووط
في الزبديه نسوي حركه الطبقات طبقه جبنه وطبقه فلفل ونكرر لحد ما نتنهي الكميه ..
وبكذا نكون خلصنا الشيدر الحراق
وهنا بشرنا الشيدر لوحده
في هالوقت هذا تكون العجينه تخمرت
ومثل ما تشوفون في الصور 2014ه كيف تضاعف حجمها و جواتها هواء ..
نرش سطح صينيه كبيره بالطحين
نقسم العجينه لكور (حجم الكور راجع لك انتي ... اذا تبين الخبز صغير او كبير )
بعد ما انتهينها من تقسيم العجينه
نبدأ ع طوول بالحشوه .. نضغط ع الكوره ثم نحشيها بالجبنه (هنا الجبنه الحراق ) ونحاول نكثر من الحشوه ) لانه بعد ما نفردها رح تتوزع ويكون الجبن قليل ..
ثم نسكرها عدل ..
ونقلبها ونخليها ع جنب .. ونكمل باقي الكور
هذا بعد ما انتهينا من الحشو
نغطيها ونتركها تتخمر ونبدأ بحشوه الجبن الشيدر (البارد ^^)
نضغط عليها ثم نحشيها ومثل ما قلنا نكثر الحشو
نسكرها عدل ..ونقلبها ع وجهها ..ونتركها تتخمر
وبعد ما خلصنا من الشيدر البارد الا خبز الحراق تخمر ( وتلاحظون تضاعف الحجم )
ونبدأ الحين بشغل الفرد ..
ناخذ خبز ه ونحطها ع سطح مرشوش بطحين
ونبدا نفردها .. ونحاول يكون شكلها دائري ..
وبتلاحظون كيف كبر القرص .. لذلك انتبهو وانتم تقسمون العجينه خلوها مثل كور الفطائر ..
لانه مهما كانت صغيره مع الفرد رح تكبر ..
نصف الخبز في صينيه مدهونه بزيت ثم ندهن وجهها بالبيض ..
والافضل تدهنين الوجه بحليب سائل ( لان البيض مجرد ماتدخلينها الفرن والفرن جدا حاااااار رح يتلون بسرعه ويمكن يعطي شكل المحترق ) << عن تجربه
هذي زينه وجه الخبز .. بيض أو حليب .. فلفل حار
سمسم
بهار الدقه او اي بهار تفضلينه يعني بالعربي اي نكهه تحبين تحلين الخبز فيها
( بهار الدقه نوع من انواع البهارات اللذيذه يشتهر عند اهل المدينه (ع ماأظن ) )
بعد ما زينا وجهه الخبز
من قريب
نتركها تتخمر 5 دقايق ..
ندخلها الفرن .. ( إضاءه الفرن سوت للصور 2014ه عمااااااااااايل )
وبعد دقايق الا الخبز يتنفخ بشكل لذييييييييييييييييذ
بعد ماطلعناها ( وتلاحظون البيض كيف سوا في الخبز شوي ويحترق )
شوفوا من جواء كيف .. يمممممممممممي اليييييمه والجبنه متوزعه
وهذا اللي اقصد يوم قلت لكم كثروا الجبنه ..
ونقدمها بالشكل اللي يرضينا ..
وبـالف صحه وعافيه ع قلوبكم ..
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©
رد مع اقتباس
