نظام مفيد لتنظيم شغل البيت



السلام عليكم ورحمة الله وبركاته



انتوا فعلا اجمل صحبه ولمه

كل سنه وانتوا بالف صحه وخير


انا النهارده جايه اقولكم على شوية افكار علشان تفيد البنات اللى لسه متجوزين جديد وشغل البيت تقيل عليهم وده طبعا نتيجه ان ماما كانت مدلعاهم وبتجيب لهم الفطار فالسرير

اول شىء لازم تستعينى بالله سبحانه وتعالى وتطلبى منه انه يهون عليكى شغل البيت والطبخ وكده
ثانى حاجه لازم يكون ليكى روتين يومى وروتين اسبوعى

الروتين اليومى



انك تصحى من النوم تصلى وتفطرى فطار خفيف وبعدين تاخدى المخدات والملايه وتحطيهم فالبلكونه علشان يتشمسوا

وبعدين تاخدى المكنسه الكهربا وتمشى بيها ف البيت كله اول يوم ممكن الشقه تاخد منك ساعه تانى يوم هتاخد اقل وهكذا لحد ما هتلاقى نفسك بتكنسى البيت كله ف 10 دقايق

بعد كده تدخلى المطبخ تشوفى هتطبخى ايه تجهزى طبيخك وتحطيه ع النار وتغسلى كل حاجه استعملتيها علشان الحوض ميتكومش ويسد نفسك

تخرجى من المطبخ وتاخدى قماشه نضيفه ( خرقه يعنى) وتدخلى ع الاوضه تمشى بالخرقه على الدولاب والسرير والسراحه وع الاوضه التانيه والتليفزيون والكمبيوتر وعلى الصالون والسفره وطبعا تشيلى التراب اللى على زجاج الشبابيك وخدى بالك لما تشيلى التراب كل يوم من ع العفش اولا العفش هيفضل جديد وثانيا التراب مش هيكوم ويتعبك ف شيله

وبعدين هاتى خرقه كبيره وبليها بشوية ميه بديتول وامشى بيها على سيراميك الريسيبشن ( الحتت العريانه بس ) اللى بتبقى حوالين السجاده

وبعدين تروحى تشوفى الطبيخ وتخلصيه

متنسيش كل فرض يأذن تجرى وتسيبى اللى ف ايدك وتصلى الفرض علشان ربنا يباركلك ف الوقت

وبعدين يا سيتى بالنسبه للحمام هاتى طبق بلاستك من اللى بتغسلى فيه الفاكهه وده تخصصيه للحمام وتحطى فيه ليفه وتمليه ميه بشويه بريل او جنرال او فيرى ومعاهم نقطة ديتول او فنيك وتاخدى الطبق ده وتحطيه على رف الحوض اللى بتحطى عليه فرش السنان وكل ما تخشى تتوضى او تعملى حمام تقومى واخده الليفه مثلا دخلتى تتوضى للضهر قبل ما تتوضى تاخدى الليفه وتدعكى الحوض دخلتى تتوضى للعصر تاخدى الليفه وتدعكى التواليت

وبعدين تروحى تدخلى المخدات والملايه من البلكونه وتفرشى السرير

خلاص كده الحمد لله البيت اتكنس والموبيليا اتمسحت والحمام نضف والطبيخ خلص
تاخدى بقى اى رشاش عندك فاضى بتاع الجلانس مثلا وتحطى فيه شوية داونى بتاع الغسيل وتحطى عليه ميه وترجيه كويس

وتدخلى على اوضة النوم وترشى رشتين ف الهوا وترشى رشتين على ملاية السرير وتقفلى الاوضه وتسيبيها

وتروحى ع الاوضه التانيه ترشيها وتخرجى ف الريسيبشن تعملى نفس القصه

تروحى بقى ع الحمام تاخدى الليفه وتدعكى البانيو وبعدين تاخدى دش وتلبسى قميص نوم حلو وتعملى مكياج هادى وتستنى جوزك لما ييجى


انتى ممكن تشوفى كل دى حاجات كتير وهتاخد منك وقت كتير هقولك اوك هتحسى بكده ف الاول بس لكن لما تعملى الكلام ده كل يوم هيبقى بالنسبالك عادى خالص وكل ده مش هياخد معاكى ساعتين
الروتين الاسبوعى


بقى تخليه يوم الخميس ده طبعا هتعملى فيه اللى بتعمليه كل يوم لكن الزياده بقى

ملايات السرير تتغير وبعد ما تغيريها ترشى عليها رشتين من الداونى او اى معطر عندك

وقبل ما تكنسى تتنى المراتب وتمسحى تحتها وتسيبى الشباك مفتوح علشان يهوى وتبصى بصه ع الحيطه كده لو فيها تراب او عنكبوت تشيليه ولو فى بقعه كده ولا كده تجيبى ليفه وتدعكيها وتجيبى الجلانس وتلمعى زجاج الشبابيك كلها

تانى حاجه

انك قبل ما تكنسى تتني السجاد من الجمبين وتجيبى جردل المسح وتحطى فيه ميه وجنرال وبالمساحه الدوبار اللى هيا الشرشوبه تقومى تمسحى حوالين السجاد كويس



وبعدين تفردى السجاد هتلاقى التراب اتجمع ف نص السجاده تقومى تشفطيه بالمكنسه وتجيبى طبق الغسيل تحطى فيه ميه وخل وتجيبى فرشة البلاط وتغمسيها فالميه بالخل وتفرشى بيها السجاده وتكملى عادى


وفى حاجه كمان ممكن تعمليها كل اسبوعين انك تخلى جوزك قبل ما يروح شغله يطلعلك السجاد والمراتب فالشمس علشان تتهوى


لما جوزك ييجى وتحضرى الغدا اول ما تخلصوا اكل تلمى الطباق وتغسليهم فورااااااااااااااا اياكى تركنى المواعين المطبخ هيتكركب وهيسد نفسك

بعد اللمواعين هاتى خرقه بليها ب خل وامسحى بيها الرخامه هتلاقيها تلمع

وبعدين تمسحى البوتاجاز وتجيبى خرقه كبيره تبليها ب ميه بديتول وتمسحى ارضية المطبخ وتحطى الشاى ع النار وتعمليه وتاخدى الكوبايتين وتروحى تقعدى مع جوزك

قبل ما تنامى لازم لازم لازم تقولى سبحان الله 33 والحمد لله33 والله اكبر 34 لان ده بيدى قوه ف البدن


يارب اكون قدرت افيدكم


متنسوش الردود والتقييم يا قمرات


واللى عندها اى اضافه ياريت تقولها علشان كلنا نستفيد


موضوع حصري لمنتديات شباب باتنة