هدي الاكلة التقليدية تعلمتها من اهل زوجي البنة مانقلكمش شحال بنينة وشحال وشحال وطبعا انا دايما سبيسياليتي تحريف الوصفات جزائرية اهنا يديروها بالدقيق عادي وانا والحمد لله دايما عندي دقيق القمح فقلت علاش مانديرهاش بيه طبعا نخلط نص نص شوي القمح صعيب في العجين تفضلو عندي وبصحتكم مسبقا
الوصفة (جزائرية) خصيصا لبروقة الحلوة
المكونات الخضرة اللي عندك انا كان عندي زرودية كابويا فول يابس ومشمخ تشفاو على وصفة (جزائرية) الفول مالح وبنين كينشمخو ونجي نطيبو نحي دايما منو ونكونجليه كيما الحمص واللي عندها الفول الاخضر يصلح والبصل والطماطم والثوم والتوابل انتاعك ماديروش برك الكمون والحروروالبطاطا الكل قطع صغيرة طبعا وشوي دشيشة تاع الفريك أي الفريك الخشين والفرماس غليه في الماء ولوحوه مع المرقة وطماطم مصبرة والزيت والملح والى الكوكوط
ديري شوي ماء وحطي على النار يتقلاو الكل
هنا كيمرقت على حساب الكمية والغاشي اللي عندك درت مغرف كبيرة دشيشة
الفرماس كيتغليه طبعا شليه على الاول ومنبعد ديريلو شوي ماء وحطيه على النار يغلي شوي وارميه على المرقة
العجين
نص دقيق عادي ونص دقيق القمح الملح والماء اعجنيهم وماتبليش بزاف باش مايتعجنش المحكوك كيتسقسه
لوزي كويرات من العجين بالزيت وديري وحدة فوق اختها وديري شوي زيت بيناتهم
حلي العجين انا سي السيد يحبو رقيق رقيقهم ولوحي على الطاجين تاع الحديد طبعا اللي نطيبو فيه المحاجب
شوفي اهنا يطيب انا نحبهم شوي محروق يطلق بنة هايلة
مع تنحيه من الطاجين لازم تبداي تفتتي فيه كيبرد يتعبك والطريقة تحكميه كشغل تكرفسي في ورقة فهمتو ولا .........................
اللي تحب يديها بزاف نقللها ماكلاه هههههههههههههههه سخون بزاف
اهنا مفتتة وواجد
تفضلو مسقي وواجد واللي يحب زيت الزيتون يدير من فوق انا مانحبوش بصح ولادي يديروه مليح للصحة ماتبعونيش
وهدا لبروقة
ان شاء الله فدتكم الاكلة هدي هايلة خاصة في البرد بصحتكم وان شاء الله طبقوه
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©
رد مع اقتباس
