الحــب يجـــمعنا






الحب يجمعنا

حب الآباء للابناء و العكس حب فطري
لكن كتير بنسمع شكوي من تباعد بين الاباء و ابنائهم
الابناء بيطلبوا النصيحه من كل الناس الا والديهم
ايه رايكم
نعمل شويه نشاطات
نعود اولادنا من صغرهم عليها
هاتخلي الحب صداقه بعون الله للابد
و هانكسب كتير لو كنا اصحاب للاولادنا
و هايخلي الحب و الموده تعمر بيوتنا



الفكره الاولي



اجتمعي انتي و اولادك و زوجك في ذكر ربنا
خلي الملايكه تحفكم في حلقه ذكر لربنا
لو اطفالك بيعرفوا يقراوا اقراوا مع بعض في المصحف
كل واحد ايه و كل يوم لو حتي صفحه
و لو لسه صغيرين و يقدروا يحفظوا خليها جلسه لحفظ القرآن ليكم كلكم
و لو اصغر خليهم يجلسوا معاكم انتي و ابوهم
خليهم يسمعوا كلام ربنا و عوديهم ينصتوا ليه



الفكره الثانيه



فكرتي مره تشاركي جوزك و اولادك في صنع اكله
هاتقوليلي صغيرين
او اخاف عليهم
جربي بس
اعملي مثلا كيكه
ممكن الاطفال يدهنوا الصنيه بالذبده
و الاب يضرب البيض بالمضرب
و الام عليها الاشراف و الباقي كله
ها تلاقوا نفسكم مبسوطين جدا و انتم مع بعض
و هاتلاقوا طعم الاكل احلي
و حتي لو باظت و ما ظبطت
هايفضل طعمها و ذكرياتها العمر كله في حياتكم



الفكره الثالثه



شاركوا اطفالكم في اي لعبه
انزلوا لسنهم و ماتتكسفوا
اجروا و العبو و اضحكوا من قلبكم
اعملوا فريق و العبوا كوره
او فريقين و شدوا الحبل
و في العيد انفخوا مع بعض بلونات و املوا بيها البيت
و العبوا بيها سوي
و عيشوا احلي لحظات في احلي دفئ



الفكره الرابعه



شاركي اسرتك في تنظيف البيت
الاب يكنس
الام تمسح
و الاطفال يشيلوا اللعب
او يمسكوا قماشه يمسحوا التراب
و خليها مهمه مرحه
مش اتعاب شاقه
و اضحكوا



الفكره الخامسه



شاركي اسرتك في ميزانيه البيت الماديه
حتي لو صغيرين خليهم يفهموا
و لما هايفهموا هايقدروا
و لما يقدروا هايكونوا مسؤلين من صغرهم
و هايعرفوا سقف لمطالبهم
و هايحسوا بتعب ابوهم عشان يأمن ليهم حياتهم



الفكره السادسه



اطفي التلفزيون وقت الاكل
اتكلموا
كل واحد يحكي يومياته
و اتشاركوا في نوادركم و احداث حياتكم
علميهم اذاي يتناقشوا
و يحترموا الاخرين
و اهم حاجه
ان مفيش اسرار بينكم



الفكره السابعه



جهزوا مع بعض لرحله
لاي مكان
حتي لو الحديقه او البحر
و اتفقوا مع بعض علي المكان
و اتعاونوا مع بعض علي التجهيزات
و في الرحله عيشوا كل لحظه سوا
و اهتموا ببعض
و اضحكوا و انسوا اي هموم او مشاكل



الفكره الثامنه



اعملي حصاله و خليها في مكان ظاهر
دي حصاله الصدقات
حصاله ربنا
عودي جوزك و اولادك انهم يضعوا فيها كل يوم و لو ربع درهم
حتي لو انتي اللي هاتديهم الفلوس دي
و عوديهم كل ما يشوفوا صناديق الصدقات في المولات انهم يتبرعوا فيها
خليها عاده ليكي و للاسره
ربنا يتقبلها منك
و يبارك ليكي في حبهم و حياتهم



الفكره التاسعه



اعملي البوم للاسره
خلي فيه كل صور رحلاتكم و اوقاتكم الحلوه
و حافظي علي ان كل سنه تتصوروا صوره عائليه
و مع مرور السنين
هايكون الالبوم ده في كل ذكرياتكم الحلوه
هاتفرحوا جدا بيه و انتم بتتصفحوا صوره
هاتفتكروا كل ايامكم الحلوه
و قد ايه
الحب جمعكم



دي افكاري المتواضعه
طرحتها ليكم و اتمني انها تفيدكم
و لو اي اخت عندها افكار تانيه برحب جدا بيها
اتمني انها تعجبكم
و يارب الحب دايما يجمعكم

احبكم في الله

و ماتنسوني من دعائكم

اللهم اجعل لي من كل ضيق مخرجا و من كل هم فرجا

بقلمي
ام نور و مهاب


موضوع حصري لمنتديات شباب باتنة