زوجي والواتس...ساعدوني

أخواتي الغاليات...
هذي أول مشاركه لي وراح ادخل بالموضوع مباشرة...زوجي انسان طيب وحنون ومستقيم ولله الحمد وحياتنا نوعا ما مستقرة عدا الخلافات والمشاكل العادية لكنه بالمقابل سريع الغضب وشكاك وغيور وهذا سبب مشاكلي معه..بالرغم اني انسانه صبوره جدا ومطوله بالي معه ع الآخر لا أجادله ولا أرد عليه وقت غضبه واذا هدأ تفاهمت معه وأحاول تجنب اي شي اعرف انه يثير غضبه او غيرته..
مشكلتي باختصار دائمآ على الجوال فهو دائما يفتح جوالي ويقلب المكالمات والرسايل والصور وكل شي..لايعترف بخصوصيتي ابدا وحتى لو احط رمز قفل يقوم الدنيا ولايقعدها لغاية مايعرفه، وأنا تجنبا للمشاكل اتركه مفتوح حتى يبرد قلبه وارتاح من المشاكل ويعرف ان ماعندي شي اخبيه او اخاف منه على قولته..وتفاقمت المشكلة بظهور الواتس اب يقرأ كل شي ويفتش محادثاتي كلها ولو اكتشف اني مسحت شي زعل وكشر وقاطعني لمده..المشكلة اني حاولت أفهمه ان الواتس ممكن يكون فيه سوالف حريم ومشاكل خاصة لصديقاتي او اهلي ما أحب يعرفها او بعضهم ترسل صورتها لاي سبب المفروض مايطلع عليها ومع ذلك مافيه فايده يزعل ويقاطعني ويجرحني بكلام اني اكيد مخبيه شي بطال ما أبغاه يشوفه...وأنا جدا تعبت معاه
اليوم دخل من الدوام وانا ماسكه جوالي اسولف مع صديقاتي وجلس جنبي وطلب الجوال وكنت بأعطيه ولحظتها وصلت صورة لوحده من صديقاتي ارسلتها لنا ع القروب لانها في اجتماع خارج العمل وكانت متلثمه لكن أنا مباشرة مسحت الصورة قبل ما أعطيه وهو يحاول يسحبه مني يشوف لانه بصراحه عينه طويله وانا ماسمحت له زعل وقال وش مسحتي قلت صورة صديقتي مالك حق تشوفها مهما كان...طبعا قامت القيامة وزعل وجرحني وقال الفاظ بذيئة لدرجة اني انخرست وانهرت وصرت ابكي..كان يقول اكيد مسحتي شي بطال وصديقاتك فيهم وفيهم......وكلام كثير حتى قدام بنتي الصغيرة رفض اطلعها من الغرفه...لحظتها انفجرت ورديت عليه باني تعبت من شكه ولقافته سنين طويلة وحاله ماتعدل عشان هالجوال والتجسس الزايد عن حده حتى لو ارسل لاختي رسالة وامسحها قال ليش مسحتيها !!!!؟؟؟مع العلم اني ولله الحمد ملتزمه نوعا ما ولافيه شي اسويه يثير شكه بهذي الطريقة وهو عارف بس يكابر..
والآن احنا متقاطعين مع العلم انه ابدا لايتنازل ولايعتذر ولايعترف بالخطأ فأنا دايما الغلطانه ويجلس زعلان بالاسابيع على اتفه الاسباب وانا تحطمت نفسيتي ما ادري وش اسوي معاه ياليت تشيرون علي..هل أنا غلطانه وكيف اتصرف واقطع السالفه هذي للابد؟؟؟


موضوع حصري لمنتديات شباب باتنة