وصل ركب الرحيل لشاطي الغربه ودار اجناب...
بعد طول الطريق اللي تمادى واتعب اركابي
ضحك وجه المدينه للمسافر والوجيه اغراب...
وانا عابر سبيل وضحكتي مابينت نابي
وقفت انظر على شط المدينه والجروح اسراب...
وسبيت ام الحنين وسالت الدمعه على اهدابي
هنا كنت الغريب بلا حبيب ولا وطن واقراب...
حزين وماقدرت اجمع شتاتي واحسب حسابي
حداني للسهر جرح(ن)سجني بين ناب وناب...
وتركني بين صمت الذكريات بصفحه كتابي
حبيبي والغلا جرح(ن)ذكرته وانفتح له باب...
وانا لوماذكرتك وانت ناسي ويش يبقابي
صحى هم الفراق اللي فتح للذكريات ابواب...
وغفيت وماصحيت الا وطيفك يطرق ابوابي
حبيبي ترسم الغيمه ملامح وجهك الجذاب...
واشوفك وين مالد النظر مع كل هندابي
ذكرت اول لقاء فيه اجتمعنا بالغرام احباب...
الين اخر لقا منه افترقنا واخر اتعابي
فداك الجرح ياوجه(ن)تركني للملام وغاب...
بقاله في حياتي طعنتين وجرح ماطابي
انا اللي كنت اضيع بنظرتك شوق ووله واعجاب...
واضيق بغيبتك وتضيق بي دنياي وثيابي
عطيتك قلب واشواق وحنين وفيك ظني خاب...
احسب انك تمنى رجعتي واثرك تسلى بي
تبعتك مثل ضحضاح السراب وجيت لك مرتاب...
واشوفك مثل الامس المستحيل وباكر الغابي
حبيبي وانت ماتسوى ملام ولاانت قد عتاب...
تعداك الملامه والعتاب وشرهه ذيابي
خطاي اني تماديت بغلاك وماحسبت حساب...
احسب ان الوفاءطبع البشر واحبابي احبابي
وعزاي اني ردعت القلب عن باقي غلاك وتاب...
وصحى في داخلي طفل(ن) غرير وشايب اعرابي
حبيبي للصبر بال(ن)طويل وللجروح أهم أسباب...
وانا مارحت ادور للجروح اعذار وأهم أسبابي
حبيبي يوم شفت انا الزمان برجعتك كذاب...
تركتك للتجافي والغرور بزحمه اصحابي
رحلت وقلت اسافرعنك واجزيك الغياب غياب...
واببعد واستريح من السهر واريح اعصابي
هجرت ارض الجروح ابغى عن تراب الجروح تراب...
عساي انساك وانسى رجعتك والجرح وترابي
يطيب الجرح والا ياعسى جرح الهوى ماطاب...
تفضل هاك جرحك واستريح وجرحي اولابي
طلع صبح الفراق بشاطي الغربه ودار اجناب...
وسبيت ام الحنين وسالت الدمعه على اهدابي
للشاعر / عادل الذيابي
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©
رد مع اقتباس
