مزاجك اثناء الحمل



مزاجك اثناء الحمل وتأثيره على طفلك

أول ما تعرف أى أم إنها حامل بتركز جداً فى تجهيز مستلزمات البيبى زى السرير والبوسيت والكار سيت وطبعا الهدوم والببرونات وتنسى حاجة مهمة إنها لازم تهتم بحالتها النفسية ومزاجها اللى بيأثر بشكل مباشر على الجنين.

وأنا حامل قريت حاجة مهمة جداً، أن كتير من الدراسات أثبتت إن العوامل الوراثية مش هى بس اللى بتحدد الطباع المزاجية للطفل، لكن الأهم من كده هى البيئة اللى بتوفرها الأم للجنين وهو لسه جواها بالإضافة طبعا لنوعية الأكل اللى بتاكله الأم والتمرينات الرياضية اللى بتمارسها.

الأكتر من كده أن لو حالتك النفسية سيئة ده ممكن يعرضك للإجهاض لا قدر الله أو ضعف نمو البيبى لأن حالتك النفسية السيئة ممكن تخليكى مش عايزة تاكلى ونفسك مسدودة جدا وطبعا أرق وقلة نوم.
و طبعا سمعت كتير قصص من أمهات أطفالهم عصبين جداً ولما لاحظوا فعلاً الأسباب وسألوا الدكاترة كان من أهم الأسباب هى إنها كانت عصبية أو حالتها النفسية سيئة أثناء الحمل.
أنا زى أى أم طبعاً كنت بتعصب وبتنرفز أوقات لأن فعلا الواحد صعب إنه يبعد نفسه تماماً عن منغصات الحياة اللى حوالينا لكن برضه لازم كنت اخلى بالى إن ده مايزيدش عن حده لأن سلامة مريومة وأطفالنا تستاهل إننا ناخد بالنا وما نقعش فى دوامة العصبية.

عشان كده وأنا حامل قررت قرار مهم جدااااا " قررت انى استمتع بالحمل " طبعا ده أول مرة تسمعوا التعبير ده ، هو مش هزار ده جد أنا قررت إنى استمتع بأنى حامل وإن مريم جوايا

أولا كل أم بتتعب نفسها ذهنياً بأسئلة كتير عن البيبى والحاجات اللى مفروض تعلمها وتهتم بيه ازاى وترضعه ازاى ومش عارفة إن ده بيسبب إرهاق ذهنى ليها، أنا بقى قررت إنى أريح نفسى من ده بأنى اسال الدكتور بتاعى فى كل حاجة عايزة اعرفها عشان احصل على معلومات صح وابقى مطمنة.

تانى حاجة عملتها إنى كنت بقرأ كتير لأن القراءة بتساعدنى على الإسترخاء ، وكنت بقرأ فى موضوعات الأمومة والطفل عشان أستفيد من ناحية تانية.
وكمان كنت بحرص إنى أمارس رياضة عشان انشط الدورة الدموية أو على الاقل لو مقدرتش كنت بتمشى كتير لأن ده طبعا بيسهل مرحلة الولادة جداً.

أهم حاجة كانت إنى ابقى سعيدة لأنى كل ماكنت سعيدة أكتر كل ماكان جهازى المناعى والجهاز المناعى بتاع البيبى بتاعى أقوى.


موضوع حصري لمنتديات شباب باتنة