النهاردة عملت على الغدا كفتة مشوية وجنبها سلطة البطاطس والباذنجان ومعاهم سلطة خضرا وسلطة طحينة
ودى صورة للغدا عشان نفسكو تتفتح للموضوع ههههههههههههه
هبدأ بالسلطة لانها أساس موضوعى
السلطة دى انا بموووووووت فيها ...ومفيش حد عملتهالو وداقها الا اما عجبتو اوى......ان شاء الله انتو كمان تجربوها وتقولولى رأيكو
( 3 بطاطس + 3 باذنجان + 1 بصلة + رغيفين عيش + حمص + بقدونس + 4 كوب زبادى + طحينة + ثوم + خل + ليمون + ملح + فلفل اسمر + شطة )
دى المقادير اللى انا عملت بيها.....ممكن تقللى او تزودى براحتك على حسب عدد الاشخاص....المقادير دى تعمل طبق كبير يكفى من 3 ل 4 اشخاص
ودى صور المقادير
طبعا الحمص زى اى بقوليات بتبقى ناقعاه من قبلها بيوم فى مياه....وهتبدأى بيه اول حاجة.....هتحطيه فى مياه وعلى النار يتسلق....وسيبيه لحد ماتخلصى كل حاجة تقريبا عشان يبقا مستوى اوى
وبعدين هتقلى البطاطس والباذنجان والعيش
دى صورتهم بعد القلى
هتفرمى البصلة فى الكبه وتعصريها بايدك فى طبق وتركنى مية البصل دى على جنب
وتاخدى تفل البصل فى طبق تانى وتحطى عليه خل وليمون ورشة ملح خفيفة وفلفل اسمر وشطة لو تحبى
هتجيبى طبق التقديم ولازم يبقا غويط شوية....وتحطى فيه البطاطس وبعدين الباذنجان وبعدين البصل
هتعملى بعد كده الصوص اللى هيتحط فوق الوش وهو عبارة عن طحينة تخففيها بمياه دافية...بس ماتخليهاش خفيفة اوى....يبقا تقلها حلو
وتحطى عليها توم وليمون وشوية خل وملح وفلفل اسمر وشطة ( كأنها سلطة طحينة بالظبط) ....وبعدين تحطى عليهم الزبادى
بعد كده تحطى العيش على البطاطس والباذنجان ..... وتصبى عليهم الصوص ده ( بس خلى باااااااااااااااااااااالك )
ماتحطيش الصوص على العيش غير قبل التقديم على طووووووووووول...لأنه لو حطتيه قبلها بفترة العيش هيطرى وهيبقا طعمه مش حلو....هو
حلاوته انه يقرمش....بعد العيش وفوقيه الصوص هترشى الحمص المسلوق على الوش وشوية بقدونس
sg'm hgf'h's ,hgfh`k[hk < 'vdrm ulg
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©
رد مع اقتباس
