اليوم جبتلكم طريقة نزع العظام من الدجاج بلا مانفتحوها من الظهر يعني وهي صحيحة و نحشوها و نطيبوها اولا في الكوكوت ومن بعد نحمروها في الفور نشالله تجيكم ساهلة انا درتها في عرضة تاع راجلي وهاد الطريقة تعلمتها من مرت عمي الله يدكرها على خير نبداو بادن الله
نحتاجو لجاجة نقية مليح بصح مانشوطوهاش فوق النار باش الجلد مايتقطعش و نخليكم مع الصور

نبداو من جهة الظهر لانو مافيهاش اللحم ياسر و تشد شوية فالوقت ندخلو السكين بالشوية و نمشوه الداخل من الجوايه في 2












وتكملي بهاد الطريقة حتان توصلي للرقبة وهادا كيفاش تولي


و من بعدها تقلبيها من جهة الصدر و دخلي السكين بين اللحم و العظم وتبداي تفتحي بيناتهم






وهنا تقدري تستعملي يدك لاش تسهلي على روحك شوية انا دايما نستعملها تعاوني ياسر

ومن ثم نروحو للفخذ نقصو الجلد و العصب اللي شادين فالكعبة و نبداو نسلكو فيه



وبعدها نروحو لجهة وين لاصق الفخذ مع الهيكل نكسروهونديرو كيما واش درنا مع الظم الاخر حتان نوصلو للوسط و نقسموها بالسكين و نحيو العظام نفس الشيء مع الفخذ الاخر

ومن بعد نكونو سلكنا اللحم تاع الهيكل الكبير و نوصلو للجنحين هادو مانحولهومش العظام مافيهمش اللحم ياسر يتقطعو كي نوصلولهم نكسرو العظم اللي لاصق فالهيكل ونجبدوه و هاك نكونو نحينا العظام هاد المرحلة مصورتهاش لخاطر لبراي ديشرجات ونا كنت مزروبة
ومن بعد نخيطو الدجاجة من جهة الرقبة و الجهة الاخرى نكونو مقطعين الثوم شرائح نديروه من الداخل و نديرو الحشوة اللحم مرحي بصل توم حشاوش ملح فلفل اكحل فقاع فرماج


بصح منكثروش لخاطر ادا كثرنا رايحة الدجاجة تتفلق و هي اطيب و
نخيطوها و نديروها فالكوكوت نديرو فنجان زيت و سنينات ثوم و رورقة رنداطيب والسبب طيابها فالكوكوت انها تطلق الصوص تاعها ومش ممكن تطلقها فالفور و من بعد نصفوها من الصوص ونحمروها فالفور و نخليكم مع الصور



نشالله تكون الطريقة ساهلة و فهمتو عليا وسمحولي على كثرة الصور وما تنساوش التقييم




©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©