الكل بيقوللي والله حليانه!شو عملتي بحالك؟؟؟شوفو شو عملت

الكل بيقوللي والله حليانه!شو عملتي بحالك؟؟؟شوفو شو عملت



السلام عليكم و رحمة الله
اليوم انا جايه و جايبة معي موضوع كبير ..ممكن تقولوا عنه انه ملف شامل ..متعلق بالبشرة و حب الشباب و الجسم و الريجيم و الرياضة ....الخ
و الحلو في الموضوع اني ما جمعته من هون و من هون ...انا مجربه كل الخطوات و الاجراءات و تجربتي بدأت من شهر 7 السنة الماضية .
و لأنكم أخواتي في الله و انا بعزكم جدا جدا ..حبيت افيدكم متل ما استفدت منكم و عسى تستفيدوا مني ..و ما بدي منكم غير دعوة في ظهر الغيب تدعولي و تقولوا :اللهم ارزق كاتبة هالموضوع المال الحلال و راحة البال و العفو و العافية ياااا رب (ما تدعولي بعريس)!!!!ههههههه اللي في بيت اهله على مهله.
طبعا انا كنت اشتغل معلمة انجليزي في مدارس القدس و خلص شغلي و استغليت قعدتي في البيت علشان اعمل تغيير شامل لشكلي و أهتم لحالي أكثر و أتفرغ لنفسي بعد اهمال دام لسنوات بسبب الدراسه و العمل.يعني نظرت للنصف المليان من الكاس و ما احبطت بسبب عدم توظيفي.

المهم ...و بدون طول سيرة رح أبدأ معكم بالبشرة و هو الجزء الاول من سلسلة تجربتي مع الجمال..و إذا أي اخت قرأت كلمة ما فهمتها ارجوكي استفسري عنها لأنه ممكن يكون في مصطلحات فلسطينية عامية البعض ما يعرفها بس انا رح احاول اكتب بلغة حيادية مفهومه ...

الجزء الاول...تجربتي مع حب الشباب>>>>>(كأنه مسلسل ههههه)

أنا يا طويلات العمر عانيت مع حب الشباب كما لم يعاني أحد من قبل .
حب بعيد عنكم مستأصل و متعمق في الجلد..و اتضحلي مع مرور الوقت انه مو حب شباب لأني وصلت سن 27 و هو في تزايد مستمر..
جربت كل ما يخطر على البال:
فكرت انه يمكن يكون السبب في الغذاء و اتبعت مختلف الحميات قليلة الدهون ..ابعدت عن الدهون و الحلويات و السكريات و روح قلبي الشوكلاتة و الموز و اللوز و الجوز و كل ما ينتهي ب (ــوز) هههه و جربت اشرب كميات كبيرة من الماء.. و كمان سمعت انه فيتامين سي بيخفف من الحبوب و أخدت من هالفيتامين..و سمعت انه الكركم بيستخدموه الهنود بكثرة علشان هيك ووجوههم صافية و شربت كركم لما معدتي انهرت و تجعلكت و صارت عجب..مو بس هيك أنا جربت كل ما يفتي فيه العطارين من أعشاب لحب الشباب و حب الشباب يترعرع و ما عنده خبر!!!! و ما استفدت

قلت خليني اعالجه من برا ...... يعني من الخارج. ما خليت شيء الا و حطيته على وجهي (تونيكات تجفف الحبوب\كريمات بمختلف الانواع و الماركات\أعشاب نعنع,بقدونس,حصل بان,بابونج,شاي أخضر,شاي اسود و منيل بستين نيله ,بطاطا ,خيار,طماطم,ليمون,لبن,عسل,حلبة,طحينية
,مرة,منقوع الرز,تفاح, فراولة, ماء الورد, نشا,حليب,ثلج....... ....يعني قولي أي شيء في المطبخ...بكون أنا مستخدمته و عاملة منه أقنعة و ماسكات بس ما في فايدة ...
بس ملاحظة : انا ما بقول انه هاي الاشياء ما بتفيد البشرة..على العكس هي مفيدة جدا ..لكن في حالات حب الشباب المستعصية فليس لها فائدة.
و عشان ما ازهقكم.. انا في النهاية رحت على دكتور الجلد و حاطه في بالي اني ارفض دواء الكيوريتان أو ما يسمى بالروكتان لأنهم خوفوني منه و ظليت اشرب في ادويه و مضادات حيوية لكن دون فايدة.. في النهاية صليت صلاة استخارة و قلت يا بنت هي موته و للا موتتين ؟! و رحت على دكتور جلد شاطر غير الدكتور الأولاني و هو أشهر طبيب في القدس الله يوجهله الخير و يمد في عمرة و يخليه و هو الدكتور عبد الله القنبر و هو كبير في العمر يعني عالج جلد ابوي قبل ما يتجوز امي(عنجد مو مزح) و أنا لحقته كمان و عالجني و شجعني على الروكتان و قال :انتي ليش خايفه منه؟!!بلا هبل!! خلينا نجوزك قبل الشتوية!(الدكتور دمه خفيف) و لما قال بلا هبل أنا اقتنعت!هههههههههه لأنني ما بجيش بالحسنى هههههههه و أخذت الروكتان و نصحني اني اداوم على استعمال الفازلين لوجهي و لشفافي للتخفيف من التشقق و ما اطلع في الشمس وعملت مثل ما قال ...هذا الكلام في شهر سبعة و الآن احنا في شهر 5 و خلصت الدوا جميعه و بشرتي و الحمد لله و لا حول و لا قوة الا بالله و ما شاء الله صارت مثل الحرير و صافيه جدا ...و كمان آخر شهر الدكتور نصحني بدهن زيت اللوز الحلو على وجهي في المساء علشان ينعمه و يصفيه كمان و كمان.
تحذير: زيت اللوز الحلو و ليس المر لأن المر سااااااااااااام و يؤذي البشرة.
و هيك انتهت معاناتي مع الحبوب و صارت بشرتي صافية و الحمد لله _ما شاء الله _ و انا بنصح كل من يعاني بأنه يروح عدكتور الجلد من البداية و ما يعمل من حاله فأر تجارب ...

خليكم معي لأن القادم أهم و احلى

يتبع في الحلقة القادمة من ....
تجربتي مع الجمال(التغيير الشامل)http://www.dzbatna.com/vb/images/smilies/icon18.gif

ما تنسوا تردوا على موضوعي علشان أعرف آرائكم و لا تنسوني من الدعاء
مع تحياتي أنا زهرة خريف القدس

موضوع مقدم من منتديات ديزاد (منتدى الحصريات)

https://fbcdn-sphotos-d-a.akamaihd.n...93518507_n.png
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©