تجربتى مع الحقن المجهرى فى مصر

تجربتى مع الحقن المجهرى فى مصر

الاول انا مقيمة برة مصر
متجوزة بقالى مدة وطبعا المعتاد اتبهدلت فجده عند الدكاترة
الخلاصة قالولى قصرى الطريق واعملى حقن مجهرى
وطبعا لظروف الاجازة الضيقه
سألت طوب الأرض ان حد يفيدنى اعمل ايه ... ملقتش فايدة
انا بقا بمشيئة ربنا هختصر عليكى الطريق

اولا طبعا تحاليل زوجك قبل ما تحطى ايدك فأى حاجة ... بيعمل تحليل سائل منوى وشروطه (( امتناع عن الجماع او الاحتلام 3 ايام متصلة بالكتيرل 4 ايام ... وملكيش دعوة بموضوع 6 ايام والعك اللى بيقولوه فالمستشفيات وخصوصا السعودية ))
ثانيا تعملى تحاليل تانى يوم الدورة وتعرضيها على دكتورة نسا موثوق منها وهى ( Lh. Tsh .PRL ) وواحد للغدة اللى هوة E2
طبعا لو فى مشكلة من اى حاجة من دول تبدأى تعالجيها لحد ما تبقى تمام قبل ما تنزلى بمدة كافيه
قالتلك هرموناتك تمام يبقا كده قدامك خطوة واحدة ... وزنك وكمية الدهون فالجسم
طبعا هتشوفى طولك ووزنك لو عندك زيادة فالوزن او كمية الدهون فالجسم لاااااااااااااااااااااااازم تخسى لحد ما توصلى لوزن معقول عشان بيأثر على العملية ونتيجتها (الدكاترة قالولى ان المعدل المظبوط للدهون فالجسم ميزيدش عن 25% )
وبخصوص نقص الوزن انا استخدمت اورليستات مع السيدوفاج والريجيم طبعا والجرعة حددها الدكتور ونزلت حبه حلوين الحمد لله وكمان السيدوفاج صح بتاع سكر بس بيقلل الوزن ويحسن التبويض حسب كلام الدكتور

كده ظبطنا هرمونات وظبطنا الوزن

هتنزلى بقا هما هيطلبوا منك تحاليل تانى فالمستشفى
طبعا هتحتفظى بكل الورق دة فدوسيه خاص باجراءات العملية
ولو كنتى خدتى اى نوع منشطات قبل كده او حقن تفجيرية او اى شئ من هذا القبيل هاتيه معاكى

وبعدها بقا الباقى فالمستشفى هيقولولك تعملى ايه

والاخير بقا
ان فترة العملية بتكون شهر فالاول دى تجهيزات وشهر العمليه
ويسيحسن بعدها تسيبى فترة معقولة عشان لما ربنا يكرمك ميبقاش فى فترة عالحمل
تقريبا اعملى حسابك فشهرين ونص ولا تلاته .. وطبعا لازم فشهر العملية زوجك يكون معاكى واحسبى اجازتك حسب دورتك لان التجهيزات بتبدأ تانى يوم الدورة وكمان العملية بتبدأى المنشطات تانى او تالت يوم الدورة
فطبعا بتحسبى الاشهر دى من دورتك ...يعنى تحددى اجازتك حسب معاد دورتك


لو ليكى تأمين طبعا اختمى كل الفواتير من كشوفات لعلاجات وحتى العملية نفسها وطبعا بتتختم من الحسابات ولما ترجعى البلد اللى انتى مقيمة فيها قدميها وانتى ونصيبك لو اتقبلت او لا او اتقبل جزء منها لأن فى شركات تأمين ممكن متقبلهاش

واى سؤال أنا تحت امركم


كل اللى بطلبه الدعاء ليا بظهر الغيب ان ربنا يكرمنى ويفرحنى
ويتم عمليتى على خير ويرزقنى من عنده فرحة تبكينى


بسم الله الرحمن الرحيم
((فَقُلْتُ اسْتَغْفِرُوا رَبَّكُمْ إِنَّهُ كَانَ غَفَّارًا يُرْسِلِ السَّمَاء عَلَيْكُم مِّدْرَارًا وَيُمْدِدْكُمْ بِأَمْوَالٍ وَبَنِينَ وَيَجْعَل لَّكُمْ جَنَّاتٍ وَيَجْعَل لَّكُمْ أَنْهَارًا))
صدق الله العظيم

وفالاول والاخر لازم تتيقنوا تمام ان كل دة مجرد أسباب ... فأدعو رب الأسباب ليسخرها لكم

موضوع مقدم من منتديات ديزاد (منتدى الحصريات)

https://fbcdn-sphotos-d-a.akamaihd.n...93518507_n.png
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©