** انا لك ياريم في الحياه والممات **
بأول ايام العمــر التقيت فيهـا ...
من يوم ماشفتـها قلبي اهديته لهـا
كنت اقرى واشوف عبارات وامثال عربيه
عن الحب والرومنسيه
الحب من اول نظره
وكنت اضحك واضحك لاسمعتها
واقول في داخلي
معقول حب ويدوم سنين ويكون من اول نظره
من العين...
احكي لكم روايتي مع بنتٍ اخذت روحـي معها
في يوم من ايام العمـــــــــر
نادانــي الوالد من داخـل الدار
وصلت عندهـ ولحد باب مجلسـه
قلت له .. سم يابو محمد
قال : سم الله عدوك ياولدي
محمد انت كبـرت واصبحت تفهم الحـال
وتفهم كلامــي اللي بقولـه لك..
ياولدي لاتقاطعني واتركني انهي حديثي
وارجوك لاتلومني على شي فات ..
أنــا من كلام الوالد خفت وتوقف الدم بعروقي
رفعت له نظري وقلت له : لبيك يابوي .. اسمعك
الوالد: انت لك عم وانا مقـاطعه من سنين بسبب
مشاكل دارت بيني وبينه..
وانا احس أن ايامي بدت تودعنــــي .. أن نبضاتي في يوم بتعلن رحيلي
حاولت انطق واقول يالله يومي قبل يومك.. رفع يدهـ
وقال ارجوك لاتنطقهـا لو اهديك ثواني عمري الباقي ولااشوفك قبلي..
الدمع مني نزل وانا بعمري مابكيت..
قلت له يبه .. آمرني باللي تبيـه..
قال .. ابي اشوف اخوي ..عمك,,قبل مماتي
قلت .. غالي والطلب رخيص..
واتفقنـــا على اننـــا في يوم نسـافر لديـار عمـي المجهول..
وصلنـــا للخبــــــــــر .. مكـان مايسكن بديت اتبع وصف ابوي ,, وانا متعجب من وين يعرف عنوانه
فضولي زاد وسـألته..
جاوبني وقال.. اخبـاره اتابعها يوم بيوم ولانسيته دايم الدوم..
قال ابوي: هنـــا وقف يامحمد
قلت هنـــااا!!! انا قدام قصـــر كبيـــر
وصلني الرد ..عمك تـاجـــر ومعروف ..
دقينـا البـاب اقصـد بوابـة القصــــــر العظيم
بعد ثواني كنـــا في داخــل بهـــو واســـع .. باين أن مجلس عمـي لرجاله ..
جلس ابوي وانا المح بعيونه نظرات الخوف والتردد
انتظرنـا ووصل السيــــــــــد وصاحب القصـر
وبعد الترحيب والتحيـه
لاحظت عمي يكلم ابوي في برود
سأله عني .. قال ابوي هذا ولدي محمد ... اخبـــار بنتك ياخوي ..؟؟
تعجب عمي وقال ومن وين تعرف أن عندي بنت..
رد عليه بنفس الجواب القديم ..
مرت دقايق يتحاورون ويتكلمون
وشوي شوي الصوت تجـاوز جدران البهو الوسيـع
ابوي كان هادي لكن عمي كان غاضب .. ويتوعد
نطق بكلمـه وقال .. لايمكن انسـى اللي سويته فيني
قال ابوي .. هذا شي قديم مضى ماله معنى
وانا ياخوي احس مماتي قريب
لاتحرمني منك باقي عمري
حاولت اتكلم نظره من ابوي ...تركتني اتراجع عن قراري
وبصوت حاد وبقسـوة قلب نطق عمي وقال
اطلـــع برى هالقصـــــــر انت وولدك ولاتحلم اني اغفر لك
ترجيت الوالد وقلت مكان انهنت فيه يابو محمد مانجلس به ثواني
وبلا موعـــد مع القدر
حوريـه او ملاك ..
دخلت المجلس وبجنون .. ودمعها على الخد يسري
وصوت نوحها يسمعه القاصي قبل الداني
وارتمت بحضن ابوي .. وبكت ..
وقالت عمـــي لاتتركنـا سامح ابوي
مالي احد غيركم لاتتركنـااا
ومن خلفها صرخـه تردد صداها
ريــــم .. اطلعي .. ماهو عمك .. مالك بها الدنيـا احد غيري أنـا
تررد الملاك رفعت الراس وضمت كف ابوي وقبلتـها
ونطقت سامحني ومشت مترددهـ تطالعنــا بعيون كلها حيرهـ..
عمي قال: المقشركة ابله انتهت وانا وقتي مايسمح..
بعد 8 سـاعات كنـا في بيتنــا وبوسط الرياض
ابوي اخذ الصمت له عنوان
وانا احترمت صمتـه..
قال ابوي.. هذا عمك مهمـا صار
قلت يبه .. الشي اللي مضى اكيد قوي وخطيـر
عمـي ماهو ناسيـــه وعايش معه لوقته الحـاضـر
قال: امك المرحومـه هي الي عمك ماهو ناسيهـا..
فهمت قصــدهـ من دون مايتكلم اكثــــر .. ابوي تزوج من امـي
والعم كان يريدهـا قبل..
قصـه ولا في الخيـــاال..
مرت سنـــه وانا طيف ريم ودمعها مافارق خيـالي ثواني
اصبحت بأحلامـي وواقعــي تتبعنــــي..
كأني مافارقتها يوم ,, ياما حلمت ورسمت ايام عمري معاها
لبستـهـا ثوب العروسـه ووقفت معها يديني تحضن كفوفهـا
جبت الولد من ريم .. وسميته
كانت كل حياتي بعد اللي صار ...ريم
اعترفت لنفسي اني حبيت هالملاك ..
وفي ليله من الليـالي
ودعنــي الغالي
دفنته وبكيت حالي من دونه
واعتزلت العالم من بعدهـ
سجنت نفسي..
ونسيت دنيتي واشغالي..
ومــر اسبوع من وفاته
وانا داخل اسواري
دق جوالي .. قمت متثاقل اشوفـه
رقم غريب .. يالله ازعـاج هالعالم
رميته .. سمعت النغمـه من ثاني
قلت مالك الا ترد
ولو كان غلطـان ولا لعاب ياويله..
الو ومن معي
هلا محمد
كان اللي يتكلم بنت ..
وصوتها كان خيالي..
قلت ؛ نعم من انتي ..
قالت ماعرفتني اكيد
قلت اكيــــد من ؟؟
أنــــا ريــــــــــم
رددت اسمها بصدري وقلبي الف مره
سمعت بصوتها انكســــــــار وحزن
وهي تردد,, لاتقول نسيتني
قلت,, ماعاش من ينسـاك
عظم الله اجرك واعذرني على التـأخير..
قلت عاذرك والله يجزاك كل خيـر
محمد انت تعبان..,,؟؟
قلت لا .. لكن مانمت الا ساعات
قالت اتركك تنــــام وترتاح فمان الله
ريم..
هلااا
لاتتركيني.. ومن التعب ماحسيت بروحـي
نمت وكأني من دهر مجافيني النوم
ماصحيت الا على نغمـة الجوال
رديت عليه .. وقلت نعم
سمعت صوتها .. وهي تردد خوفتني عليك
يومين وانا احاول اخذ اخبـارك
اخذت واعطيت معها بالكلام
وتكررت المكـالمـات بيني وبينهااا
ضمتني فيــهـا ريم بحب وحنـان
عوضتني عن سنين حرمـاني
اصبحت تعرف .. وقت نومـي وقت مايدخل الزاد جوفـي
اصبحت حيـــاة محمد ريم .. وحيـاة ريم محمــد ..
وفي يوم اعترفت لهـا بحبي المكتـــوم ..
ريم النفس ضاقت من الأنتظـار
والقلب تعب مثل الجســـد وهو يحـاول يصبر ويجـاهد الروح .
سمعت همسـها وهي تنطق محمد يادفا قلبي وضمـاهـ اسمعك ..؟
ريـم أنــا احبـــك ..
احب صدى صوتك وضحتك
اشتـاق لك ..
ريم علمتيني معنــى العشـق ..
من سنه مرت .. من اول ماشفتك ..
ابتدت اول ايام عمـــري..
محمــــد .. قلت لبيك أنـــا ..
احبــــك ..
آآآهـ واخيـــرا ياقلبي . ترجم حروف الغــلا
وانثر الورد على جبل الوفـــــــــا
وغـــرد مع الطير
وسابق الــــريح واعــزف الحــــــــان الشـوق ..
تصالح مع امواج البحر
وتغنى مع شمس الأصيل
وانسى كل الهموم
واذكــــر كلمة احبك يوم غادرت من شفاه ريوومـــه
وسكنت منــزلـــك ودارك ..
ريم أنــــــا اوعدك اني لك حيـــاة وممـــات .. اوعدك ..
أنـــا بكــره مســافر ..
سمعت شهقـه من صدرهـا الحنون .. وين ناوي تتركني ..؟؟
قلت مسـافر للخبـــر .. ابي احقق الحلم
واترجمـه للواقـــع ..
أنــــــــا جاي اخطبك من عمــــــــي ..
ردت علي .. خايفه خايفه .. كل شي ينتهي ..
قلت انا وعدتك اني لك حياة وممات ومايفرقني عنك غيــر موتي ..
ودعتهـا وجهزت نفســـي للسـفر..
ماقدرت اصبر قررت اني للخبـــر اسري .. بليلي
ومرت الســاعات وانا في البـــهو الوسيــــــــــع
دخل عمـــي .. وهو يطـــالعني بنظرات غريبه
وقال .. انت ..
أيـه أنــا محمد ولد اخوك .. المدفون تحت تربته ..
ماعندي اخـــو .. كم مره أنـا كررتها ... وان مات الله يرحمــه
في البدايـه لمحت بعيونه نظرهـ حزينه ..لكن تراجعت وحلت مكانها نظره بلا معنى
حسيت انه في لحظـه تأثر ..
عمـــــــي أنــا ابيك في طلب ..؟؟
قول .. اللي عندك .. وقتي انا ثمين .
ناقصك مال .. سياره جديده .. بيت .. وظيفه
قول انا احب اتصدق واعمـل الخيـر..
بعد كلامـه تمنيت اني اصرخ بوجهه واقول
إنسان بلا مشـاعر .. جبل من القسـوه والجمود ..
أنــا بخيــر ونعمــه ومانقصني شي ..
طالع فيني بإستغراب .. اجل طلبك وش يكون ؟؟
قلت ريــــم .. هذا هو طلبي ...
ابي اتزوجهـــا بعد اذنك ياعم ..
شفت بعيونه استحقـار العالم كله .. ومن تكون لجل تطلب ريـم ..
جرحنـــي .. ذلني .. هزأني .. وفي النهايـــه طردني ..
رجعت للريـاض كيف وشلون .. مدري ..
وجوالي طول الطريق تتردد نغمـاته ..
آآآه ياريم .. انكتب علي اعيش بدونك ..
دخلت البيت .. وانا منهار .. ضايع بين عبراتي .. وبحور آلامـــي
استمريت على هالحــال .. يومين يمكن اسبوع او شهــر ..
يتبع ........
https://fbcdn-sphotos-d-a.akamaihd.n...93518507_n.png
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©
