لو كانت الحاجة تعرف المواجيب ماخلت الطيب وراها يعاني
أصيب فى ظني بالأيام وآخيب
وأشبه معاني واختلف عن معاني
واقف على حد الرجا والمكاتيب
وأمشي ورى قلبي وأنا في مكاني
من يوم ماغيب شبابي ثرى الشيب
وأنا أتخيل دمعته لابكاني
ومن ضيقة الخاطر وقل الأصاحيب
بان التعب حتى بنظرة زماني
ومن كان بالدنيا قليل التجاريب
يشوف هزلات الليالي سماني
بعض القصيد أحيان نقص وعذاريب
ماله حضور ولا شعور ومواني
وبعض القصيد إليا حضر له معازيب
وإن غاب أقصى غيبته بالمحاني
مثل المسافة والضما والمشاريب
نقرب وتبعدنا حدود الأماني
صراحة الطيب وشرهة هل الطيب
عندي معزتهن معزة اخواني
وياللي على الفرقا كثير المطاليب
ليتك قبل لا تروح تصبر ثواني
البعد بعد القلب ... لا شك لا ريب
الحب الأول مايعوض بثاني
وفرقا المعاند ماوراها مكاسيب
كلمة وقايلها بعظمة لساني
يجوز يقوى قلبك البعد ويغيب
لكن يبي يبطي وهو مانساني
للشاعر زعل الرشيدي
https://fbcdn-sphotos-d-a.akamaihd.n...93518507_n.png
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©
