للانوثه احكام في الحركه والكلام

[ام بهاء]

للانوثه احكام في الحركه والكلام



مساء الخير للي عندهم المساء اور صبحكم الله بالخير للي عندهم الصبح
يالله حيهم كلن بيوزره ,,





ملينا صح من مواضيع الميك اب .. صبغات .. عنايه شعر ..عنايه رجولك .. الخ … خلااص احس كلن يعرف بالمكياج وكثير الحين يصبغون شعورهم بلا مشاغل وحتى حفظنا بعض المواضيع من كثر مايتكلمون فيها ..موضوعي اليوم باين من عنوانه ,,
الأنوثة و ما أدراك ماالانوثه .. الانوثه لها رونقهاا الخااص وجاذبيتها المتميزه .. جمال المراه وانوثتها محسووبه عليهاا وهذا الشي يقيد حريتنا في كثيييير من الاوقاات ..ونصير ننتبه لتصرفاتنا خوف اننا نسوي شي يخرب البرستيج بتاعنا .. بس نلاحظ أي تصرفات تلقائية منا مثل ((مشيتك على الدرجه مادري كيف كنك تسحبين رجولك ..كثيره حركاتك وانتي تسولفين ..سمعتي لك نكته وضحكتي بصوت مره عالي وصجيتي خلق الله على هالضحكه ..ولا العكس سمعتي خبر مره شين همن صرتي تصيحين وتشاهقين يحول وكلن يشوفتس ..وانتي تشربين يطلع صوت ...الخ ))مثل هالتصرفات نخسر معها صورتنا الملائكيه وزود على تسذا صعب اصلح اللي خربته وشوهته بثواني يحول ...حتى لو كان شكلي شيااكه ومرتب وحلوو ..
فقالو خبرا الاتيكيت انه لزوم انه يكون فيه مناهج او مدارس بكبرها تهتم بتعليم هالسلوكيات للبنت مع اللباقه والشياكه (( ياليته والله يحطون لنا هالاتيكيت بكبره بمناهجنا اسنع لنا من موادهم البايخه ))
لان الجماال مو بس على بوهتك او لابسك وخلاااص لااااااا يتعداه لتصرفاتك وسلوكياتك كلهاا …طريقه جلوسك ووقوفك .. لباقتك بالكلام .. ضحكك .. مشيتك ..طريقه بلعك .. الخ
كل هالنواحي تعطي انطباع جميل لطرف الثاني للي يشوفونك
الزبده بموضوعي اني بطلق بعض من النصائح اللي قالوها خبراء الاتيكيت بخصوص سلوكيات مظهرنا الخارجي .. واللي يعتبر من ضروريااات الانوثه ومكمل للجمال


اتيكيت المشيه الصحيحه




راح ابداء بالمشي لانه اكثر شي يلفت انتباهنا اذا شفنا أي وحده .صح ولا لا ؟؟. يمكن نشوف بنت تكون حليوه وانيقه .. بس مشيتها غلط في غلط تسحب رجولها .. ولا مجلعده ,, اول انها تقلد مشيت وحده من النجوم او انها حتى تقلد عارضات الازياء حتى خخخ طبعا قالو ذا شي غلط اننا نقلد النجوم وغيرهم في التلفزيون .. لان حقين الدعايه والمخرجين فارضين عليهن مشيه خاصه .. لزوم الدعايه يعني وبس شكل ..ولا هن مايمشن كذا في حياتهن العاديه
طبعا في قواعد عامه للمشي للي نسويه وللي نحذر منه لزوم نطبقها زين بصوره عفويه بدون تكلف وبدون تقلييييييييييييييييييييد
اول شي
احذري
إحذري هالاشياء
-لاتقلدين مشية أي وحده شفتيها كانت نجمة أو غيرها حتى لو عجبك شكلها

لأن اغلب هالمشيات تحسين فيها تصنع بالحيل واصلن اوقات احس انها يرقصن مايمشن
-تمشين وكتفوك متجه قدام ..ذا غلط مره
-الركبه .. انتبهي تحركينها بشكله الدائري مو لزوم تثنينها يعني

-أنتبهي تمشين بخطوات مره واسعةوكبيره او أنك تمشين بخطوات قصيرة
-برضو خصرك موب لازم تحركينه مره يمين ومره يسار وهز ياوز مير ياكثر اللي سوون تسذا

هذي الأشيااء اكبر غلط نسويها نحاول نتجنبهاا اكثر

هذا اللي راح تتحاشينه
طيب تعلمي كيف تمشين بيكوون عكسه
-رجولك وانتي تمشين خليها بشكل مستقيم قدام الثانيه
-برضوو ذراعك حركيها بنتظام وانتي تمشين مثل اليد اليمنى مع الساق اليسري والعكس بالعكس
-وانتي تمشين حاولي ترجعين كتوفك على ورا
-عودي نفسك على المشي بجذع مستقيم على قولتهم رزي عمرك بدون تصنع , ورأسك يكون عالي بس انتبهي مووب معناتها تكبر يعني

شوفو يقولون هذي الحركه مفروض نتدرب عليها .. تعرفون العاب السرك . هماه في حركه للبهلوان يبسط ايده على الجنب ويبدا يمشي على اطراف اصابعه على الحبل ؟؟؟ ايووووه بس ...كل يوم امشي عشر دقايق بالبيت بس خلي مشيتك زيه بالضبط واكيد موب على الحبل عاد ..هذي المشيه تخليك تحافظين على توازنك بصوره طبيعيه.. واصلن تشوفونها دايم بالتلفزيون يتدربون عليهااا
وبروضو حتى فيه طريقه ثانيه .. انك تحطين كتاب فوق راسك لمده خمس دقايق وهمن تمشين وانتي رازه روحك ورجولك تكون مستقيمتن وياويلك اذا طاح ..
اخر شي لاتستصعبونها .. مع الوقت بيكون شي عادي بس عودي نفسك عليها وبتصير كنها جزء من حياتك




*الصعود والهبوط مع الدرج له قواعد واصوول *




ياربيييييييه يافيه بنات مايعرفن يمشن مع الدرجه !! يانك تسمعين صوت طقطقه نعلتها بقوووووه مره ولاا تنتظرينها علبال ماتعد الدرجات كلها او اذا جت نازله طمرت درجتين سوى .. ابد مثل البزران موب بنت ذي
الصعود والهبوط برضو له اتيكيت خااص ولزوم نهتم بمشيتنا وحنا على الدرجه علشان يكون مضهرنا كوويس على الاقل
في الصعود لازم ننتبه على هالملاحظات هذي
انتبهي
-لاتصيرين ماسكه الدرابزين بقووه وانتي ماشيه تقل عجيز يحول يادووبك تمشين .. لا امسكيه بشكل رقيييق موو بقوه يعني .. ولاتخافين منتي بطايحه
-انتبهي تنحني لقداام كثيرر حتى على الدرجه لزوم الرزه وترى موب مشكله لو تنحني شوي لان اوقات يصير صعب عليك
-المشيه الصح انك ترفعين رجولك الى مستوى الدرجه بس ..همن نزليها بشويش وبدون صوت وعقبه ادفعي جسمك للاعلى وانتي رافعه رجلك الثانيه << عساني عرفت اشرح بس
برضو في النزول للازم ننتبه اكثر احس انه اهم من الصعوود
-احذري وانتي نازله تكون ركبتك بعيدات عن بعض ..وضهرك جاي على قدام .. يعني المشيه ذي اشوف انها لرقاله بشعه حتى لو عندهم اسباب خاصه .. موب عاد انتي
-لاتضربين الدرجه بكعبك وتزعجين خلق الله على هالطقطقه
-برضوو خلي قوامك منتصب ومتزن .. وانحني بس شوي علشان تشوفين الدرجات ..وعلشان ماتتطيحين وتبلشين بعمرك يعني مجرد انحنااء بسيط
-اخر شي طبعا إثني ركبتك الخلفيه يهدوووووو ولطف وانتي نازله


موضوع مقدم من منتديات ديزاد (منتدى الحصريات)


https://fbcdn-sphotos-d-a.akamaihd.net/hphotos-ak-ash4/482113_236967293114455_1193518507_n.png (http://www.dzbatna.com/vb)
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى (http://www.dzbatna.com/vb)©