مع الدكتورة حلى جميع مشاكلك بشرتك وجسمك وشعرك

[ام بهاء]

مع الدكتورة حلى جميع مشاكلك بشرتك وجسمك وشعرك



السلام عليكم ورحمه الله

ازيكم ياحبايب قلبى
لانى مش ملاحقه بجد ارد عالرسايل هنا ف المنتدى بخصوص مشاكل البشرة والجسم

فقلت الافضل انى اخلى الموضوع ده اسئله واجابااااات بس كل الاسئله اللى جاتلى هكتبها هنا واجاباتى عليها

بالترتيب طبعا بدون اسم العضوه عشان الخصوصيه

وهعملهم بالترتيب بشره وشعر وجسم

نبدأ على بركه الله

اولا مشاكل البشره
س/
بدّي وصفة لتبييض الأسنان ؟؟؟؟؟

ج/هتجيبى معلقتين كربوناتو - معلقتين ملح - معلقتين جنزبيل بودره - معلقه زيت نعناع
واخلطيهم وحطى كل يوم شويه عالفرشاه وادكى اسنانك كويس وشوفى اللؤللؤ لو استمريتى عليها روووووعه



س/ انتى املى الوحيد
فى الدنيا
عاوزة حل فعال واكيد للهالات السودة


ج/شوفى ياجميل علاج الهالات السوداء النهاااااااااائى هو متعب شويه بس نتايجه رهيبه
هتجيبى زيت لوز حلو وليس المر لانه سام وتخلطيه مع زيت جنين القمح
وتدهنى بيه كل يوم تحت العين فى اتجاه دائرى من بره لجوه وتنامى
ويوميا تعملى كمادات شاى دافيه على عنيكى وهى مغمضه او شرايح بطاطس لمده ربع ساعه
وتاخدى كل يوم كبسولعه فيتامين e بنسميه عندنا هرمون الانوثه وهتدعيلى


س/ اذا سمحتي عندي مشكلة ان انفي فيه نقط سودا صغيرة زي مايكون شعر صغير تحت الجلد

ج/

اسمها بثور سوداء ياجميل

اخلطى خل تفاح مع ملح وزيت زيتون وادعكى بيه الانف يوميا فى شهر هتروح باذن الله


س/انااااااااااا
معلش بعد اذنك عايزه حل للاسمرار اللى حولين الفم




ج/ الاسمرار اللى حول الفم
معلقه دقيق ومعلقه ليمون ومعلقه زيت لوز حلو اووووووووو جنين القمح
وتعمليهم عجينه وتفرديهم على المنطقه وتسيبيهم نص ساعه وتعمليها يوميا


س/ بشرتي دهنية وبتطلع حبوب فيديني بالله عليكي



ج/ بالنسبه لبشرتك ياروحى

بياض بيضه - معلقه ليمون - م زبادى

اى ماسك من دول هتحطيه على وشك 30 ساعه مش اكتر وهيكون مرتين فى الاسبوع والنتيجه هايله



س/انا بقى عاوزة حل للحبوب اللي بتظهر في الوجة بس بتبقى بلون البشرة يعني تحسي ان البشرة مش مستوية كده
شكرا يا قمر



ج/ فهمت قصدك
اعملى الماسك ده مرتين بس فى الاسبوع وقوليلى النتيجه
معلقه ليمون-معلقه جلسرين-معلقه لبن-معلقه عسل ابيض-معلقه نشا


س/ عندي اثار حب الشباب في ضهري وكتفي
لو سمحتي عاوزه حل بسرعه عشان فرحي بقيله شهرين



ج/ لعلاج البقع البنيه الناتجه من اثر الحبوب

- 3 ملاعق لوز مطحون.او ارز مطحون - 3 ملاعق زيت لوز- 2 ملعقة عسل
- 2 ملعقة ليمون
هنخلط المكونات وهنحطها على البشره وادعكيها بايدك عشان تشيلى الخلايا الميته من البشره وركزى على اماكن الحبوب وسيبيها نص ساعه وبعدين اغسليه بالميه الدافيه تحفففففففففففه


س/لما بقلع الطرحه الجزء المتغطى بلطرحه ابيض و الى متعرض للشمس مسمر يا رت تلاقيلى حل



ج/ بالنسبه لتوحيد لون الوجه
فتعملى الماسك ده يوم بعد يوم

بعد ماتشربى القهوه هتاخدى البن اللى اتفضل تحت وهتدهنى بيه وشك وتسيبيه لما ينشف وبعد كده تغسليه مره فى مره هتلاقى بشرتك فتحت ونعمت بس عشان تضيعى ريحه البن ادكي وشك بليمونه



س/تفتيح تفتيح تفتيح انجديني جسمي قلب ع الوان رقبتي غير وشي غير كوعي غير ركبتي انا بئيت كوكتيل خطيييييييييييييير ههههههههههههه



ج/اولا لازم تغسلى المنطقه كويس وتطهريها بالديتول وتنشفيها كويس اوى بعد كده هتجيبى نص ليمونه وعليها كربوناتو وتفركى المنطقه كويس اوى وبعدين تحطى الخلطه دى زيت زيتون مع بودره تلك مع مايه ورد بنسب متساويه وسيبيهم ساعه كامله وبعدين خشى خدى شاور والنتيجه بتبان كمان اسبوعين جربوها هتعجبكم



س/
لوسمحتي يعني انا جيت مالمصيف و بشرتي بتولع من كتر السواد
و لغايه دلوقتي بقشر بس في دراعي نفسي ارجع للوني الطبيعي في وشي اهم حاجه و دراعي و رجلي .. حاسه اني مش هرجع للوني بتاع زمان عشان كمان انا مسمره كده كدا مالجامعه و الشمس في العادي .. ربنا يكرمك يا قمر






ج/ طيب شوفى ياجميل
اول حاجه هتجيبى ليفه مغربيه او خشنه شويه وتفركى بيها عالناشف بالراحه
بعد كده تحطى الخلطه دى عالاماكن المسمره مااااااااعدا وشك
زيت زيتون - سكر - بن - ملح حليب وده متوفر ورخيص اوى وتعملى سنفره كويس وتغسلى جسمك
مره فى مره لونك هيرجع زى الاول انشاء الله متقلقيش

وبشرتك تحطيلها الماسك ده



4 معالق دقيق ابيض - معلقتين عسل ابيض - 3 معالق لبن

نخلط كل ده ونحطه ماسك للبشره نص ساعه ومتنسيش الرقبه الماسك ده بيفتح جدا



س/
انا بشرتى كانت فى الاول دهنيه وملمسها ناعم
لكن دلوقتى بقى ملمسها خشن وجافه
وانا كنت فى الاول لون بشرتى بيضه ودلوقتى مع خشونه البشره حاسه انى اسمريت
ممكن تقوليلى اعمل ايه علشان ترجع زى الاول


ج/ شوفى ياحبيبتى الماسك ده مجرباه بنفسى والله بس لازم تداومى عليه

بودره التلك مع مايه الورد ولبن وعسل ابيض وياريت تكون بودره بيبى جونسون واعملى منهم عجينه وحطيهم زى ماسك مرتين فى الاسبوع لمده نص ساعه واى ماسك تفتيح تانى احسنلك متسمعيهوووووووش
س/ الله يكرمك يارب ويبارك فيكي ويسعدك سعادة ما بعدها شقاء أبدا يارب

أنا عروسة وفرحي بعد 7 شهور تقريبا

عندي
- بشرة وجهي / باهتة وتحسيها ما فيها نضارة .




ج/ ربنا يتمملك على خير ياحبيبتى
البشره :
4 معالق دقيق ابيض - معلقتين عسل ابيض - 3 معالق لبن

نخلط كل ده ونحطه ماسك للبشره نص ساعه ومتنسوش الرقبه الماسك ده بيطرى الجلد وتمنع التجاعيد وبيفتح كمان وبيخلى الوجه نضر جداااااا



س/ الكلف من الولاده فى اماكن من الوجه وشكرا لكى على مجهودك وكل سنه وانتى طيبه





ج/ وانتى طيبه ياحبيبتى

علاج الكلف


معلقتين عصير خيار ونص معلقه خل تفاح ومعلقه عسل ابيض ومعلقتين ميه بصل
تحطيهم على وشك ساعه وتعمليه مرتين اسبوعيا


وياريت تعملى الكريم ده وتحطيه فى التلاجه وتدهنى منه قبل النوم


المكونات:4 معالق كبيره من منقوع النعناع - 3 م كبيره زيت جوز الهند- 2 م كبيره زيت زيتون - 1 م كبيره زيت لوز حلو - معلقه عسل نحل

الطريقه:نحضر الاول منقوع النعناع هنحط 4 اعواد نعناع فى فنجان مايه مغليه لمده ساعتين ونصفيه بعدين نحط الزيوت مع العسل عالنار لحد ما تدوب وبعدين نضيف منقوع النعناع على الخليط ونقلب كوووووويس وعالتلاجه

س/
السلام عليكم كل سنه وانتى طيبه

انا بشكرك اووى على مجهودك ده

وانا مشكلتى اللى عملالى حاله نفسيه هيا الحبوب مع انها مش كتيره ولا عميقه اوى بس بتتجمع عندى فى مكان واحد ف دقنى من تحت او ف قورتى كده من بين العين ومن فوق وبتبقى حمرا وملتهبه وفيه ف ظهرى وصدرى من قدام وانا رحت لكذا دكتور لما بقى عندى صيدليه ادوية وكريمات بس مفيش فايده واللى مزعلنى اوى ان بشرتى كانت صافيه ورايقه وحلوه من قبل سنتين كده وللعلم انا بشرتى دهنيه شويه بس مش كتير

وعندى سؤال انتى قولتى فى فى رد او 2 هنا من ضمن الوصفات للحبوب كان فيه زيت زيتون او لوز بس ازاى والزيوت بتزود الحبوب



ج/ وانتى طيبه ياحبيبتى الشكر لله ياقمر
انا بس عاوزه اسالك سؤال كان عندك حب شباب ولا لا
بتعانى من زياده وزن
بتاكلى شيكولاته وسبايسى كتير ولا لا
الحبوب دى ظهرت نتيجه كريم غلط او ماسك غلط
جاوبينى عشان اقدر افيدك

لكن تصحيحا للمعلومع ياجميل ليست كل الزيوت محفزه للحبوب
فى زيوت مهدأه ومنشفه للجروح والحبوب وهى(الزيتون -اللوز الحلو-جنين القمح-البقدونس-البصل )


س/حل لمسام الوش
واثر الحبوب الوصفه اللي حضرتك كاتبها بتاع اللوز او الارز فيها زيت عادي احط زيت والبشره دهنيه



ج/لمسام الوجه

معلقه كبيره دقيق قمح او دقيق ذره - شويه مايه دافيه

هندهن الاول الوش بطبقه زيت زيتون وبعدين نحط الماسك 20 دقيقه ونشطفه بيقفل المسام لحد كبير والله


وحطى زيتعادى فى الوصفه متقلقيش



س/انا انا انا
ممكن وصفه لصفاء البشره لما باجى اغسل وشى بحس بنغابيش كده
حاجات زى حبوب او تعاوير
ربنا يكرمك يارب.




ج/ وصفه لصفاء البشره

قناع الاميرات( وقناعى المفضل )

4 معالق دقيق ابيض - معلقتين عسل ابيض - 3 معالق لبن

نخلط كل ده ونحطه ماسك للبشره نص ساعه ومتنسوش الرقبه الماسك ده بيطرى الجلد وتمنع التجاعيد وبيفتح كمان



س/ انا وشى رفيع فيه حل ولا مفيش

والتقيم ممتاااااااز بجد موضوع راااائع






ج/ فيه طبعااااااااا
قرصين خميره جافه يوميا على غير ريق لمده شهر
+


هنجيب نص معلقه زيت زيتون وربع معلقه جنزبيل بودره وهنخلطهم ونحطهم على بشرتنا 3 مرات فى الاسبوع لمده نص ساعه كل مره والنتيجه بتبان بعد شهر





س/ _وشي دايما اصفر شاحب فى حل ربنا يكرمممممممممك



ج/
4 معالق دقيق ابيض - معلقتين عسل ابيض - 3 معالق لبن

نخلط كل ده ونحطه ماسك للبشره نص ساعه ومتنسوش الرقبه الماسك ده بيطرى الجلد وتمنع التجاعيد وبيفتح كمان



س/صابون فيت بار حلوه؟
لاى بشره يعنى؟



ج/ كويس ياقمر بس دوف الطبى افضل منه كتير



س/ بس بقى انا عايزة صن بلوك يكون ارخص من اللى قولتيلى عليه ممكن معلش تعبتك كتير وكمان حاجة تفتيح للبشرة





ج/ ممكن تستعملى لانكوم او لونا كويسين ياحبيبتى
ووصفه التفتيح

بودره التلك مع مايه الورد واللبن والعسل الابيض وياريت تكون بودره بيبى جونسون واعملى منهم عجينه وحطيهم زى ماسك مرتين فى الاسبوع لمده نص ساعه



س/انا لو سمحت انا خمرية لسه فى ثانوى عايزة بس حاجة مفيدة لبشرتى لانى اول ماحطيت فيرند لافلى حبب وشى بس لحقت الحمد لله ومحطتهوش عايزة خل لبشرتى





ج/ طبعاااااااااا لازم يعمل كده لانه منتج ردىء وانا دايما بحذر منه
ياريت تعملى الكريم ده عندك فى البيت وتحطى منه ياقمر
المكونات:1 م كبيره زيت لوز حلو - 1 م كبيره زيت سمسم -1 م كبيره زيت جوز هند - 4 معالق عصير ليمون - 2 م كبيره بودره تلك
الطريقه : هنسخن الزيوت مع عصير الليمون على نار هادئه ونقلب الخليط لحد ما يبرد
ونضيف عليه بودره التلك ونخلط كووووويس اوى لمده دقيقتين
الكريم ده مغذى جدا للبشره ولازم نحطه على وش نضيف تماما وتسيبيه على وشك اطول فتره ممكنه عشان يعمل مفعوله السحرررررررررررى



س/ بسأل على حاجتين


اولا : الميزوثيرابى و حله فى مشكله نحافة الوجه لأنى كنت عاملة دايت ووجهى خس جدااااا
و هل لازم كل فترة اعمله
و تكلفته تقريباا كم




ثانيا : علاج الهالات السوداء بالليزر هل مجدية فعلا و برده التكلفة و الاثار الجانبية
و شكرا جزيلا




ج/ واللى يقولك على حاجه افضل من الميزوثيرابى
انا بس عاوزاكى تحكمى عقلك ميزوثيرابى يعنى حقن يعنى احط حقنه فى وشى وانفخه تمااااااااااااام
طيب ماهو كأنى بنفخ بلونه وبظاقل تأثير الهوا ده هيروح وهيحصللى تجاعيد فى وشى

يبقى الحل انى الجأ للطبيعه

قرصين خميره جافه على الريق او قبل الفطار بساعه ومتخافيش عمرها ماهتتخنك
هتخلى وشك نضر جدا وتمنع التجاعيد والهالات

بالنسبه للهالاات فدى كذا حد مجربها وشكروا فىالنتيجه والله

زيت جنين القمح مع زيت اللوز الحلو وتدهنى كل يوم قبل النوم وتعملى يوميا
كمادات شرايح بطاطس او شاى دافى اوكى ياقمر



س/ السلام عليكم ازيك ياقمر عامله ايه
انا عايزه وصفه لتفتيح البشره وياريت بمنتجات اشتريها من الصيدليه مش وصفات طبيعيه لاني بزهق منها
ممكن لو تقللنا برنامج يومي نمشي عليه لتنضيف البشره كل يوم يعني نغسل الوش بصبونه ايه وتزاي نقفل المسام ونضف البشره وشكرا ياقمر




ج/ سؤال مهم وشامل بصراحه ركزى معايا ياقمر

الغرض من الوصفات الطبيعيه عدم الاضرار بالبشره انا عارفه ان نتايج المستحضرات
اسرع لكنها ضرر اما الوصفات الطبيعيه ان منفعتش فمش هتضر فهمتينى

عامه فى كريم كويس ممكن تستعملى يااما شيرلى او اكتيف اكس

اما كبرنامج عنايه للبشره فهو من الطبيعى ان البشره تتغسل كل يوم بصابونه طبيه زى دوف
بعدها التونك
ويتعمل ماسك مرتين فى الاسبوع لنضاره البشره من الوصفات الطبيعيه
قبل الميك اب بتجيبى قطنه وتحطى عليها مايه ورد من التلاجه وتمشيها على بشرتك
عشان تقفل المسام فبشرتك متشربش الميك اب فنقلل الضرر
ننضف البشره كويس جدااااااا من الميك اب وبالراحه لان العنف ممكمن يسبب تجاعيد وهالات




س/جزاك الله خير على مجهودك كنت عايزة اعرف نوع بودرة للوجة مش مضرة انا بشرتى مختلطة وكمان نوع واقى للشمس يكون oil free وهل ينفع احط واقى الشمس الاول وفوقة البودر



ج/ وجزاكى مثله ياحبيبتى
بالنسبه لنوع بودره كويس فانا دايما برشح ماكس فاكتور الاصليه و احذرى التقليد لانه مضره جدااااا

الصن بلوك بقى فى ماركات كتير كويسه شرط تكون حمايه 50
وللبشره الدهنيه emulsionو ifluid من ماركات غاليه زى لوريال - لوك

وعادى ممكن تحطى الصن بلوك وتحطى الميك اب عادى








بكده انا خلصت بفضل الله معظم الاسئله اللى جاتلى على البشره
وطبعا لو فى اى اسئله تانى اتفضلوا وانا تحت امركم



والمشاركه الجايه اسئله واجابات الجسم

يارب يقدرنى وافيدكم ولو بدرجه بسيطه

احبكم جميعا فى الله
موضوع مقدم من منتديات ديزاد (منتدى الحصريات)


https://fbcdn-sphotos-d-a.akamaihd.net/hphotos-ak-ash4/482113_236967293114455_1193518507_n.png (http://www.dzbatna.com/vb)
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى (http://www.dzbatna.com/vb)©