فطور اليوم

[admin]

اليوم زوجة أخي دخلت للمستشفى و يما وختي راحو يزوروها و ماقعد غير أنا فالدار
فكنت مضطر لتحظير الفطور

حظرت شربة فريك و طبق البطاطا و الجلبانة و الدجاج في الفرن
خسارة ماكانش الصور، طلع شكلها حلو و عجبت أفراد العائلة
أعدكم باحظار صور أطباق الأيام المقبلة لأني موالف نطبخ جزائري وحدي

شرح مفصل طريقة تحضيري لأطباق اليوم:


1- الشربة :
قليت اللحم مع الخضر في شوية زيت نباتي (بصلة- فلفلة- قرعة - جزرة - حبة بطاطا -حبة طماطم- كرفس)
زدت شوية حمص و ملعقة طماطم مصبرة و باقة من الكسبر و ورقة رند و تبلت بشوية ملح- فلفل اكحل - قرفة
ضفت الماء سخون وخليتو يطيب

بعدما طابت الخضرة نحيت اللحم و طحنت الباقي و رجعت اللحم من جديد و رديت القدرة على النار
نصف ساعة قبل الادان ضفت الفريك لي كنت شمختو من قبل و خليتو يطيب حوال ربع ساعة
ضفت في الأخير كسبر و نعناع مفروم (قطع ليمون حسب الدوق)


2- الطبق التاني :
خلطت برك واش جاء في راسي لكنت طلع طبق شباب و بنين
قليت بصل+ثوم+قطع دجاج و تبلت بالملح + فلفل اكحل + قرفة + شوية زعفران فقط للون الأصفر الحلو
ضفت جزرة مقطعة صغيرة، شوية زيتون اخظر مقطع مغلى و الجلبانة اللي غليتها من قبل ثم المعدنوس المفروم
ضفت الماء و خليتو يطيب

في نفس الوقت قليت البطاطا ديالي لي قطعتها قطع كبيرة و ماخليتهاش تدبال باش تكمل طيابها فالفرن

في الأخير دهنت صحن الفرن، حطيت البطاطا و فرغت عليها المزيج و درتهم للفرن حوالي نصف ساعة
كي طاب، زينت الطبق بشوية معدنوس



https://fbcdn-sphotos-d-a.akamaihd.net/hphotos-ak-ash4/482113_236967293114455_1193518507_n.png (http://www.dzbatna.com)
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى (http://www.dzbatna.com)©