خبز الدار هشوش ومايديرش الحريق في المعدة

[walid]

لسلام عليكم، عندي ليكم وصفة (جزائرية) تاع خبز الدار والله يجي خفيف وبنين وفوق هذا مايديرش الحريق في المعدة راني دايما نفوخ بيه قدام عجوزتي اللي كل ما تأكلوا تولي تشكر فيا وتمدح . المهم ما نطولش عليكم هاكم المقادير والطريقة معا:
لزوج خبزات خذي 3 كيلات سميد+ كيلة فرينة* أنا نكيل بالباطة تاع لابال 500غ* زيدي 2 بياض بيض + مغرفة قهوة محسن الخبز+ 2 مغارف كبار ممروطين خميرة الخباز+ 3مغارف كبار لحظة+ 1/2 كاس زيت + ملح+ سينوج وبلي بالماء الدافئ مع العجن الجيد ثم خلي العجينة ترتاح مدة 20د.
عاودي اعجني الخبز مع ماء الزهر و تبليله بالماء الدافئ حتى يولي طري ويلصق في اليد، ديري كرتين كبار، و زيدي خليه يرتاح مرة أخرى مدة 20د. ثم اطرحيه في بلاطو مدهون بالزيت وادهني من فوق بخليط صفار البيضتين مع قليل من القهوة ودردري الجلجلانية من فوق وخليه يطلع 15د ثم ادخليه الفرن الساخن باش يطيب من تحت ويحمار من فوق..
جربوه وردولي الخبر.



https://fbcdn-sphotos-d-a.akamaihd.net/hphotos-ak-ash4/482113_236967293114455_1193518507_n.png (http://www.dzbatna.com)
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى (http://www.dzbatna.com)©