العجينة المورقة للمبتدءات

[romaissa]

السلام عليكم اخواتي


شفت بلي الكثير من الاخوات يطلبوا طريقة العجينة االمورقة وانا ملي تعلمت هذا الطريقة ولا ماعنديش مشكل فيها و حبيت نشاركم بيها ما تنساوش تدعولي برك


المقادير: 300غ فرينة، 225 غ زبدة، قرصة ملح، كاس ماء بارد جدا


الطريقة:


راني موضحة بالصور تقطعي الزبدة (وانا هنا قلت زبدة على خاطر جربت مرغرين التوريق ما عجبتنيش بنتها انا شخصيا نستعمل star انت ليك الاختيار) مكعبات صغيرة وتكون باردة ياسر تحطي قرصة الملح على الفرينة ثم تحطي الزبدة و تحاولي برك تلصقي الزبدة على الفرينة ماشي تعجنيها ثم ديري الماء بالشوية حتى تتلملك العجينة دريها في بلاستيك و تحطيها في الثلاجة نصف ساعة او في المجمد ربع ساعة ثم حليها بالحلال و اطوي الجانبين الى الوسط ثم زيدي طية اخرى و ادخليها الثلاجة ثم عاودي حليها وهذا المرة الطية تكون عكس اتجاه المرة الاولى كيما حطيت صبعي باش نوريلك هذاك الخط نتاع الطية الاولى ديري الطية عكسه ثم ندخلها الثلاجة وتكرري العملية 4 مرات اذا العجينة مازال مش ملسة زيدي حتى المرة 6 على خاطر انا مع الزبدة ندير 4 و مع المرغرين درت 6 مرات


اليوم ما درتش ميلفاي على خاطر الاخت رماضنة راهي دارتويكثر خيرها اليوم راني درت مملحات نعطيكم فكرة برك و انتم شكلوا كيما تحبوا


ملاحظة:المهم كي تحلي العجينة وتشكليها خليها ترتاح برة الثلاجة ساعة ثم ديريها تطيب حتى بالنسبة للميلفاي


اولا الفولوفون الصور تشرح مفصل الطريقة في اللصق استعملت بياض البيض و الوجه استعملت الصفارو الحشو درت صوص بيشاميل مع التن تقدري ديري الجمبري مكان التن و الفرماج من فوق


الشكل الثاني تفتحي العجينة رقيقة ديري 30cm على 15cm تحطي حربوش لحم مرحي متبل بالثوم و ملح وفلفل اكحل وحشاوش


روليه وقطعيه ادهنيه بالبياض وديري السانوج و الجلجلان اذا حبيتي ديري الدجاج او الديك الرومي مكان اللحم المرحي قطعيه مقروطات صغار


الشكل الثالث قطعي شرائط و دوريهم على اللحم اومرقاز صغيرادهنيهم بالبيض خليهم يرتاحوا ساعة ثم طيبيهم


لي عندها اي سؤاال راني هنا


شهية طيبة


<legend>الصور المرفقة</legend>

http://www.dzbatna.com/images/attach/jpg.gif
Mohamed1063.jpg&rlm; (http://www.dzbatna.com/attachment.php?s=ce0af4b2c363d4d43daa878077cca9f6&attachmentid=32179&d=1321867926) (10.3 كيلوبايت, المشاهدات 2551)


http://www.dzbatna.com/images/attach/jpg.gif
Mohamed1064.jpg&rlm; (http://www.dzbatna.com/attachment.php?s=ce0af4b2c363d4d43daa878077cca9f6&attachmentid=32180&d=1321867946) (10.4 كيلوبايت, المشاهدات 2564)


http://www.dzbatna.com/images/attach/jpg.gif
Mohamed1066.jpg&rlm; (http://www.dzbatna.com/attachment.php?s=ce0af4b2c363d4d43daa878077cca9f6&attachmentid=32181&d=1321867975) (10.4 كيلوبايت, المشاهدات 2534)


http://www.dzbatna.com/images/attach/jpg.gif
Mohamed1067.jpg&rlm; (http://www.dzbatna.com/attachment.php?s=ce0af4b2c363d4d43daa878077cca9f6&attachmentid=32182&d=1321868020) (9.9 كيلوبايت, المشاهدات 2530)


http://www.dzbatna.com/images/attach/jpg.gif
Mohamed1068.jpg&rlm; (http://www.dzbatna.com/attachment.php?s=ce0af4b2c363d4d43daa878077cca9f6&attachmentid=32183&d=1321868065) (10.2 كيلوبايت, المشاهدات 2547)




https://fbcdn-sphotos-d-a.akamaihd.net/hphotos-ak-ash4/482113_236967293114455_1193518507_n.png (http://www.dzbatna.com)
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى (http://www.dzbatna.com)©