أخواتي المتزوجات .....مميز ومهم

[ام بهاء]

أخواتي المتزوجات .....مميز ومهم


السلام عليكم ورحمة الله وبركاته

هلا أخواتي ..

أكيد مستغربين لأني من زمااااااان ماكتبت موضوع جديد..

أعرف إني مقصره فحقكم لكن أملي إنكم تعذروني..

كلامي معاكم اليوم ماهو إلا مجرد نصيحه صغيره من قلب أخت محبه لكل وحده فيكم

أخواتي

في الفتره الأخيره لقيت أغلب المشاكل بين المتزوجات تكون ناتجه عن إهمال الأزواج لهم

أغلب المشاكل تحكي عن إهمال الزوج

وكثير أعرفهم تقول لك لو زوجي ماهو مهتم بيا أنا ليه أهتم بيه!

بمعنى أصح تقول لك لو هوا مايسوي لي شي ولابستفيد منه شي ليه أنا أتعب نفسي عشانه!

أقول لكم أخواتي شي..

أمس بيني وبين نفسي قاعده أفكر في الآيه اللي تقول *وعجلت إليك ربّ لترضى*

تعالوا ياأخواتي وأنصح نفسي قبل ماأنصحكم..

نخلي كل أمورنا إللي نسويها سواء للبيت أو للزوج كووووولها نخليها لله ونطلب الأجر والمثوبه من الله

يعني...

مو تسوي كوب الشاهي *مثلاً*لزوجك عشان يرضى عليكِ واللا يقولك كلمه حلوه لاااا

قولي أنا بسويه إرضاءً لربي ولأن هذا من حسن التبعل للزوج ومأجوره بإذن الله

والله ياأخواتي إني جربتها والله والله تحسي وإنتي تسوي الشي وتقدميه بسعاده غير طبيعيه

لأنك ماتنتظري شكر ولاثناء من أحد إنتي متشوقه للأجر من رب العالمين

لو زوجك قالك كلمه حلوه خير وبركه ولو ماقالها أجرك على الله

أختي..

حتى اللبس فيه زوجات كثييييير بعد الزواج يهملوا نفسهم

تقولك ليش ألبس له واتعب حالي وزوجي قاعد طووول الوقت مهملني واللا مايلبس أنا كمان ألبس إللي يريحني وأطنشه ولاأهتم فيه

تلقيها تهمل نفسها ماتلبس ولا تتظبط إلا وهيا طالعه ليه طيب!

لاااا وتجيكي وحده قال يعني تنصحها ..تقولها طنشيييييييه لاتسوي له ولاتعملي له مثل مايطنشك طنشيه وحده بوحده

إللي تبغى لك الخير تقولك سوي إللي عليكِ وأجرك على الله

أختي لاتنتظري شي ولا شكر ولاثناء من أحد أنتظري أجرك من الله بس

والله والله إنك مأجوره إن شاء الله

أدري فيه رجال تصرفاتهم ترفع الضغط وتطير العقل لكن أقول لك معليش تصبري وكله بأجره

يوم أصبري ويوم ردي بكلمه ويوم اسكتي واحتسبي اجرك على الله لا تصيري خسرانه دنيا وآخره

لو اتكلمتي ورديتي على طوووول الخط ..

كلمه بكلمتها وحركه بحركه وإسائه بإسائه راح تخسري زوجك واحترامه لك وتنغصي حياتك..

والأسوأ فيه زوجات ترد الإسائه بالخيانه!!وهذا ليس مبرر أبداً


على الأقل أضمني لنفسك أجر في الآخره لاتضيعي أجرك بيدك..

لماتكوني محافظه على نفسك ومأديه كل واجباتك ومنتظره أجرك من الله ماتبغي شي ولاشكر ولاثناء من زوجك ولاغيره راح تحسي إنك مرتاحه ..

حتى لو زوجك غليظ واللا سفيه واللا قاسي واللا متطلب واللا لسانه طويل واللا مهملك واللا مايهتم بك

تقولي ليه أنا ألبس وأتظبط أتعب نفسي ومايمدحني ليه أعطيه ويجحدني ليه احبه ويكرهني ليه أتقرب منه ويبعد عني ليه اهتم فيه ويهملني!

أنا أقولك ألبسي وأتظبطي وحاولي تتقربي منه إرضاءً لله وتذكري الآيه إللي تقول*وعجلت إليكَ ربّ لترضى*

خلي غايتك رضى الله قبل رضى زوجك
أختي

ألبسي وخليه يقول لك ماهو حلو

أطبخي وخليه يقول طبخك ماهو عاجبني

أحسني إليه وخليه يقول إنك مقصره

في النهايه إنتي تظفري بالأجر والثواب على صبرك وهو ربه حسيبه*وماربك بظلام للعبيد*

أختي

نصيييييحه من قلب يحبك..

يوم زوجك يغضب أصبري تذكري إنك مأجوره

ويوم يصرخ أصبري وأنت مأجوره

ويوم يظلمك أصبري وأنت مأجوره

ويوم يبخل أصبري وإنتي مأجوره فيه أحلى من كده!


لا تقولي ماأقدر بالتدريب والصبر كل شي يصير

اليوم تردي على توبيخه بكلمتين وبعده بكلمه وبعده تقدري تسكتي

أختي لاتعتبري أبداً سكوتك ضعف ..ولاتعتبري صبرك ضعف بالعكس

السكوت مايقدر عليه إلا قله من الناس فهذا معناه إنهم من الصفوه

صح أقولك تكلمي دافعي عن حقك لكن كلمه إثنين لاتزيدي مشاكلك وتضيعي أجرك

بيني وبينكم ياأخواتي من يوم تعلمت أحتسب أجري على الله صرت حتى يوم تصير بيننا مشاكل وأسكت وزوجي لو تكلم أفرح وأقول بيني وبين نفسي أحسن أحسن صرخ

إنت تنكتب عليك ذنوب وأنا يزيد رصيدي من الحسنات<<بالله ماهي فكره!

حتى يوم أجتهد وألبس وأتظبط حتى لو ماعجبه أقول الحمد لله سويت إللي عليا وأنا مأجوره إن شاء الله هوا لوتكلم يهديني حسنات ولو ماعجبه بكيييفه إللي عليا سويته..

ومثل ماقلت لك

حتى لو زوجك قصر إنتي أعطي

حتى لو أهمل إنتي اهتمي

حتى لو جحد إنتي تكرّمي

صدقيني مأجوره إن شاء الله

لاتهملي نفسك ولابيتك ولاتقصري في أي من واجباتك وتخلي لأحد مدخل عليكي

لو صارت مشاكل لاقدر الله اول كلمه راح يقولها زوجك إنتي مهمله نفسك وبيتك ويتهمك بالتقصير

ساعتها ووقتها تقولي هوا إللي بدأ هوا إللي مهملني وتسردي حكايات وتبرري ووقتها محد ينصفك فعلاً إنتي غلطانه بإهمالك لنفسك وتقصيرك

أفضل شي وأسلم حل عشان المركب تمشي والحياه الزوجيه تستمر إنك تعطي وتدفعي المركب وتحاولي جاهده توصليها لبر الأمان وتحتسبي أجرك من رب العالمين وتحتسبي صبرك قربه تتقربي بها لله

لاتقولي ماأقدر تذكري الأجر العظيم من الله وتصبري وقادر ربي يصبرك ويؤجرك

اعذروني على الإطاله لكن هذا كلام من قلب يحبك ويتمنى لك الخير وأتمنى كلنا نساعد بعض وندفع بعض ونصبر بعض حتى نوصل لبر الأمان ونفوز برضى الرحمن
منقول للإفادة






https://fbcdn-sphotos-d-a.akamaihd.net/hphotos-ak-ash4/482113_236967293114455_1193518507_n.png
موضوع حصري لمنتديات شباب باتنة