عندك افرازات ....تعالى شوفى الحل ؟؟؟؟؟؟؟؟؟؟

[ام بهاء]

عندك افرازات ....تعالى شوفى الحل ؟؟؟؟؟؟؟؟؟؟

السلام عليكم يافتوكاتى العزيزات
أنا قررت أعمل ملخص الموضوع فى موضوع لوحده لأن فيه ناس كتير مبتكملش الموضوع لآخره فمبتقراش الملخص اللى ف الصفحات الأخيرة
وأنا عاوزة أكبر قدر يستفادو من الموضوع وكمان عشان الأسئلة اللى بتجيللى ع الخاص

نبدأ بسم الله
السلام عليكم

أنا النهاردة هتكلم عن موضوع الافرازات المهبلية اللى أكيد أى ست متجوزة أو حتى أى بنت بتعانى منها ف أحد فترات حياتها
وأنا عارفة ان الموضوع ده كتير اتكلموا عنه
بس أنا ان شاء الله هتكلم عنه بطريقة عملية أكتر وأسهل
بحيث كل واحدة تعرف تشخص نفسها من لون وشكل الافرازات والاعراض اللى عندها
وده طبعا للحالات البسيطة او اللى ف بدايتها مش حالة تحتاج انك تروحى للدكتورة

نبدأ بسم الله




أولا لازم نفرق بين الافرازات المرضية اللى بسبب ميكروب والافرازات الطبيعية اللى ربنا خلقهالنا عشان تحمى المكان ده وعشان حاجات كتير زى سهولة حركة الحيوان المنوى مثلا



ازااااااااااااى؟؟؟؟؟؟؟؟؟؟؟


الافرازات الطبيعية دى لا لون لا رائحة
يعنى
شفافة وملهاش ريحة
زى المخاط اللى بتفرزه مناخيرنا ف أول أيام البرد قبل مايتلون
وأنا آسفة ف التشبيه ده
بس عشان أقربلكم الموضوع


أما الافرازات الغير طبيعية بتكون ليها لون ومش شفافة(معتمة شوية)
وممكن يكون ليها ريحة قوية ومش كويسة أو ساعات بتبقى ريحة عادية ومش مميزة
وكمان ممكن يكون معاها أعراض تانية زى الحرقان أو احساس بالهرش أو احمرار ف المنطقة دى

أول حاجة هبدأ بيها ياذن الله هى الالتهابات الفطرية(candidiasis)
وأنا حبيت أبدأ بيها لانها عند جزء كبير من الستات المتزوجات وكمان البنات اللى متجوزوش وحتى البنات الصغيرين قوى 12 و 13 سنة
سببها
*عدم تنشيف المنطقة دى كويس وده من أهم اسبابها وأكثرها انتشارا
وبالذات ف البنات الصغيرين اللى محدش علمهم انهم ينشفوا كويس
وطبعا حتى لو مجرد ان منطقة المهبل مندية بس ده بيساعد على نمو الفطر ف المنطقة دى
وبالمرة طريقة التنشيف بتكون من قدام لورا عشان مش ننقل ميكروبات من منطقة الشرج للمهبل
*تانى سبب هو اللى بتاخد مضاد حيوى لانه بيقتل البكتيريا النافعة اللى بتعمل معادلة وتمنع تكاثر الفطريات
*وبرده اللى مناعتها ضعيفة ودى هتلاقيها تاخد العلاج مكظبوط جدا وجرعته سليمة وبرده العدوى ترجعلها تانى
*فيه حاجة كمان اللى عندهم الالتهاب الفطرى ده وبيروح وييجى عليهم كتير جدا وبيكون أول حاجة نكتشف بيها مرض السكر لان السكر بيضعف مناعة الجسم ضد الميكروبات بس طبعا بيكون معاه أعراض تانية بس الست مكبرة عنها

نيجى بقى للاعراض واللى بتبقى واضحة وضوح الشمس للالتهاب الفطرى طبعا
الاعراض
افرازات تقيلة ف السمك ولونها ابيض زى الزبادى أو الجبنة
والحاجة المميزة ليها جدا هى الهرش والحرقان اللى موجودين معاها
لدرجة ان ف بعض الحالات المكان ده بيحمر ويتعور من كتر الهرش
العلاج
لو الالتهاب بسيط ولسة ف أوله يبقى كفاية الحاجات الموضعية
اللى هى كريم ضد الفطريات
وأنا هقول المادة العلمية وبعض الاسامى التجارية المشهورة اللى موجودة ف الصيدليات
الاسم العلمى للكريم هو( كلوترايمازول)
وف الصيدليات(ميكوناز كريم مهبلى) وده أرخصهم>>>Miconaz vag.cream
(جاينوداكتارين)GynoDaktarin cream
وده بالنسبة لكل الناس المتزوجات والبنات
أما المتزوجات فلهم اضافة وهى طبعا اللبوس المهبلى
بس اوعوا يابنات لكم دعوة بيه ده للمتزوجات فقط وأنا بأكد وبقول
اللبوس المهبلى فيم منه أنواع كتير جدا بس أنا هقول أشهرهم
(امريزول ن)Amrizole Nوده ميزته ان فيه حاجة للفطريات وحاجة للميكروبات اللهوائية
يعنى 2*1 وسعرة رخيص ومناسب جدا
والادوية اللى فاتت دى موضعية يعنى ملهاش أى أضرار
وممكن للحامل حتى أو اللى بترضع انها تاخدهم بمنتهى الامان باذن الله

نيجى بقة للى عندهم الالتهاب جامد أو متحسنوش ع العلاج الموضعى اللى فات ده
ودول هياخدوا كبسولة واحدة فقط
أيوه هى جرعتها مرة واحدة ويفضل أن تكرر بعد أسبوع وهى
فلوكونازولFluconazoleهى المادة العلمية
أما الاسامى التجاريةهى
تريفلوكان 150ملجمTreflucan,ودى أرخصهم
دايفلوكانDiflucan
فلوكورالFlucoralبرده سعرها كويس بس كبسولتين مع بعض للى هتكررها بعدها باسبوع
فانجيكانFungican
ودول ليهم موانع استعمال اللى هى الحمل والرضاعة واللى عندهم قصور أو فشل ف الكبد
أما اللى عندهم قصور أو فشل ف الكلى فبردو ميخدوهاش الا باذن طبيبهم المعالج لان فيه بعض الحالات بتحتاج جرعة اقل على حسب كل حالة



نسيت أكمل بقيت اللبوس المهبلى
طبعا قلنا أمريزول ن وده بيتحط كل يوم لمدة عشر أيام مرة واحدة قبل النوم ويتساب لحد الصبح
وفيه بردو جاينوزولGynozoleوده بيتحط بردو قبل النوم لحد الصبح لمدة 3 أيام
وفيه مونيكيورMonicureونفس النظام قبل النوم لمدة ستة أيام
ألبوثيل Albothylقبل النوم لمدة 6 أيام
وطبعا فيه أنواع كتير وأنا من وجهة نظرى مش مهم النوع
المهم انك تتعالجى صح وتمشى ع العلاج صح وبعد كدة تحمى نفسك وتتبعى نظام النضافة فالمكان ده
ويستحسن انك تستخدمى غسول أو تشطيف مهبلى أثناء فترة العلاج
وده طبعا منه أنواع كتير أشهرهم
بيتادين غسول مهبلى (غطاء منه على نصف لتر ماء دافئ)
أو فيه باكتات زى تانتم روز (كيس على لتر ماء دافئ)
أو أى نوع انتى بترتاحيله
وطبعا اوعى تدخليه جوه فتحة المهبل ده مجرد تشطيف عادى كأنك بتستحمى
أو ممكن تقعدى فيه بس متدخلهوش جوه لان ده بيدخل ميكروب معاه

ان شاء الله هنتكلم النهاردة عن نوع تانى من الالتهابات
وهى الالتهابات البكتيرية(Bacterial Vaginosis)
أعراضها
افرازات لونها لونها أبيض معكر أو على رصاصى كدة
وناخد بالنا انها مش زى الالتهاب الفطرى
التانية بيضة تقيلة وزى الزبادى أو الجبنة
وريحتها زفرة شوية
علاجها
*الاسم العلمى>>>ميترونيدازول(Metronidazole)أقراص
والاسم التجارى فلاجيل500ملجم(Flagyl)
وده جرعته قرص كل 12 ساعة لمدة 7 أيام
أو فيه جرعة بديلة وأسهل وجرعة واحدة وهى 4 أقراص مرة واحدة
أيوة الأربعة مرة واحدة
*وفيه دوا تانى أحسن وأحدث من الفلاجيل وكمان مبيعملش الطعم اللى بيضايق ف البق بس أغلى شوية وهو>>>الاسم العلمى سيكنيدازول(Secnidazole)
وجرعته أربع أقراص مرة واحدة
ودوا تانى(Fladazole)وبرده نفس الجرعة أربع أقراص مرة واحدة
*وفيه بردو المادة العلمية تينيدازول(Protozole)
وبردو جرعته 4 أقراص
موانع الاستعمال
الحامل واللى بترضع مينفعش تاخد السكنيدازول والتينيدازول
أما الميترونيدازول أو الفلاجيل فلازم باستشارة دكتورة وهو اللى يقرر على حسب الحالة
وطبعا مع اتباع قواعد النضافة
ويفضل استخدام غسول مهبلى لمدة أسبوع أو 10 أيام





فيه ملحوظة مهمة نسيت أقولها
ان أى حد ليه تعليق على كلامى
أو فيه حاجة غلط ف كلامى وعاوز يصححها
فيتفضل يقول عشان الكل يستفاد

هتكلم ان شاء الله عن النوع التالت من الالتهابات وآخر نوع
مش معنى كدة ان دول بس الميكروبات اللى بتصيب المهبل وعنق الرحم لأ بس دول أشهر 3 أنواع واللى عادة كل دكاترة النسا بيدوا دوا ليهم على الوصف أو التشخيص الاكلينيكى من غير اختبارات أو مزرعة
ومعظم السيدات بيرتاحوا العلاج ده
النوع التالت هو اسمه غريب شوية
التهاب المشعرات المهبلية(Trichomonas Vaginitis)
سببه
طفيل أولى اسمه المشعرات المهبلية
وده من أكثر أنواع العدوى انتشارا
الاعراض
افرازات لونها مخضر شوية وتحسى انها فيها رغاوى
حرقان واحساس بالرغبة بالهؤش فى هذا المكان
وألم أثناء الجماع
احمرار فى المهبل وعنق الرحم
العلاج
علاجها زى علاج الالتهاب البكتيرى بالضبط
اما فلاجيل 4 أقراص
أو سيكنيدازول 4 اقراص جرعة واحدة
أو فلادازول أو بروتوزول 4 اقراص بردو جرعة واحدة
الفرق الوحيد


ان دى عدوى بتتنقل أثناء العلاقة الجنسية


فلازم الزوج ياخد هو كمان ال4 أقراص

يا اما العدوى هترجعلك تانى بمجرد ماتخلصى العلاج
يفضل استخدام اى غسول مهبلى أثناء فترة العلاج
مع اتباع قواعد النضافة فى هذا المكان

أنا كدة خلصت الأنواع الشائعة من الميكروبات اللى بتصيب المكان ده وبتسبب افرازات
بس فيه نقطة مهمة جدا جدا
وان معظمنا بيكون عنده التهابات مختلطة
يعنى ايه
يعنى كذا ميكروب مع بعض ف نفس الوقت
يعنى لو شكيتى ان عندك كذا لون من الافرازات او كذا عرض من دول مع بعض يبقى لازم تخدى العلاج بتاع كل نوع
ايوووووووووووه
والموضوع بسيط جدا لان الالتهاب الفطرى مميز جدا بافرازات بيضة مجبنة او زى الزبادى وبالهرش اللى معاه
فبكدة تقدرى تستبعديه بسهولة
ولو موجود فعلاجه سهل كبسولة واحدة
والنوعين التانيين علاجهم واحد ولو شكيتى ف آخر نوع مفيش مشكلة ان زوجك ياخد الاربع حبوب
لانهم ليهم فوايد تانية كتير
مثلا بيعالجوا الاميبا اللى ف الامعاء فمش هيخسروا
واللبوس المهبلى ثبتيه ف كل الانواع لانه علاج موضعى مالوش ضرر
وف نفس الوقت بيعالج معظم الانواع بردو
ولو مكانش عندك التهابات وحسيتى ببداية التهابات بسيطة لسه ف أولها
أو حرقان لسة بسيط وف أوله
متستنيش لما الموضوع يتطور نصيحة حطى اللبوس فقط لمدة 3 ايام او اسبوع مش هتخسرى حاجة
والموضوع هيتلحق ف أوله

آخر حاجة عاوزة أقولهالكم
ان كل البنات والستات عندهم افرازات طبيعية ربنا عاملهالنا وليها فوايد كتير
وبتزيد وقت التبويض
بس طبعا لونها شفاف وملهاش ريحة
ومبتعملش اى أعراض ولا هرش ولا حرقان ولا احمرار
وفيه ناس بتبقى عندها الغدد اللى بتفرز الافرازات دى متضخمة شوية
ودى طبيعتها وبالتالى الافرازات عندها بتكتر شوية
ودى مش محتاجة علاج
لان فيه ناس معندهاش اى التهابات والافرازات الطبيعية دى واهماها وعاملالها قلق مستمر


أنا كدة خلصت
ولو فيه أى سؤال أواستفسار على الرحب والسعة ماتنسوش التقيييييييييييييييييييييييم والدعوة الحلوة بتثبيت واتمام حملى على خير



https://fbcdn-sphotos-d-a.akamaihd.net/hphotos-ak-ash4/482113_236967293114455_1193518507_n.png
موضوع حصري لمنتديات شباب باتنة