أسراري خلت الكل يحسب لي ألف حساب

[ام بهاء]

أسراري خلت الكل يحسب لي ألف حساب

السلام عليكم يا بنات كيفكم


اليوم جيت بتكلم قليل عن أسراري
وهي موب أسرار كثر ما هي عادات مستمرة وأثمرت ولله الحمد

اليوم بتكلم معاكم بشكل نقاط وكل نقط بشرح شوي عليها

1- حطي لنفسك معيار وما ترضين باقل منه

يعني حطي لعلاقتك كلها حد من بعده ما ترضين ب ادنى شيء
يعني جاراتك يسلمون عليك يزورونك بس ما ياخذون من أغراضك الشخصية وهكذا
والامور لازم تنكتب وتراجع كل فترة
لو مو مكتوبة تعتبر احلام وأماني


2- لا ترمين نفسك على أحد

لا تاخذين رقم أي صديقة جديدة الا بعد ما تطلبه هي منك اوتحسينها متقبلتك بنسبة 70% أو اكثر غير كذا راح تحرجين نفسك وبتحس هي بالمقابل انك تركضين وراها وتصير تتغلى وتشوف نفسها


3- لا تطلبين شيء من أحد تقدرين تسوينه

تعودي تصيرين عزيزة نفس حتى على أخوانك الصغار هالشيء راح يعزز شخصيتك ويبعد عنك صفة الإتكالية
وحتى الناس تصيرتحب جلستك وقعدتك

4- 4لا تسبين نفسك قدام كائن من يكن

يعني لا تقولين انا سمرة قصيرة دبة حتى لو هالشيء واضح مثل وضوح الشمس انتي بطريقتك هذي تفتحين عيون البنات عليك ويصيرون ينتبهون له وانامن الناس شخصيا فيني شيء ما كان عاجبني وطنشت ولا تكلمت عنه واشوفه ما يعوق اشوفة شيء مختلف عن الناس وبالفعل محد درى حتى يوم شلته

ادري الفضول ذبحكم شامة كانت هههههههه بس بمكان غلط


5لا تعطين أحد أكبر من حجمة

انسانة استغلاليه وتطعنك في الظهر لا تعطيها اكبر من حجمها عامليها بحزم وخلاص انسي موضوعها لا تجلسي تاكلي في نفسك عشان الموضوع وتتشكي قدام كل أحد لالا طنشي واعتبريها صفحة ونزعتيها من حياتك وخلاص
مثا لثاني : كوافيرة في مشغل حاولتي تسوين معاها علاقة من باب حسن الخلق وطنشتك لاتتضايقي الله واكبر يعني طنشي وكبري راسك اللي ما يبيك قلعته



6لاتركضين ورى احد

لا تركضين ورى اخت صديقة زوج زميلة عمل ابدااااااااا
خلي دايم الناس تركض وراك مو من باب الغرور ولا هو تعارض مع حسن الابتداء والمبادرة
زميلتك تركضين وراها دايم تتصلين تسالين اذا ما ردت ترسلين لها مسج تتصلي عالبيت وعلى اهلها وكمان مطنشة
جربي اسبوع ما تتصلي والله بتتجننو دايم اعملي كذا لا تجافي الناس كثير ولا ترمي حالك خليك بين وبين
تتصلين متى ماحسيتي انك طولتي عنها مو هي سحبت عليك ولا تركضين وراها دايم


7حياتك لك انتي مو لغيرك
وهذي المفروض خليتها في أول الموضوع لكن ما جت في بالي
حياتك لك عزيزتي لك انتي مو لآحد غيرك شيء خاص فيك انتي تدخلين اللي تبين فيها وتطلعين اللي تبين ..عمرك لك وحياتك لك وأول اولوياتها انتي
تدرين ليش لانك لما تحبين نفسك بتخافين عليها من النار لما تحبين نفسك بتتغذي صح لما تحبين نفسك ما ترمين نفسك على احد


8صحتك تاج راسك

صحتك أغلى ما تملكين ولا أحد بيعوضك فيها لو خسرتيها حتى الأطباء بيعلمون اللي ربي قدرهم عليه مو أكثر
لا تتحملي المرض على حساب غيرك ما ابي اطفش اهلي ما ابي ازعج اخوي ما ابي اكلف على زوجي
متى ماحسيتي ان في شيء خطر روحي لاطباء واسالي وحاولي ترى محد بسال فيك
ولا تاكلي شيءمضر ولا تجازفي بعمرك ابر تبيض على حبوب تكبير ارداف على تنحيف على مدري وشو على وشو طيب؟؟؟


9دلعي عمرك
وهذا هو سري الأهم لاني أحب أخذ وقتي بكل حالاتي يعني ادلع عمري لما اتحمم اتحمم شوي شوي
لما اكل اتدلع على نفسي روااااااااااق وبنظافة واتكيت ما اتطيفق بالاكل بالعكس اكل كاني في حفلة ملكية
لما اروح للصالون لحف او لاي شيء ادلع عمري يعني لو المكان حار اقولها طفي التكيف لو شغلها يعور اقولها تخف علي لو شغلها ما عجبني وتحاول تقنعني لا اوقفها وانبها بلطف بالمستشفى اطلب اللي ابي وادور راحتي لا تصيرين حمالة اسية لا دلعي عمرك واطلبي حقوقك بس بأدب


10الاتكيييييييييييت
هذا الموضوع يحسبونه البنات بس كيف تاكل وترتب السفرة ولا هو اصلا نظام حياتي كامل

لما تمسكي القلم امسكية بكل رقة لما تمشي خلي مشيتك رزة وواثقة مو تسحيب رجول ولا ركض بمراثون كلامك ذوقك مشيتك تسريحتك مكياجك وطريقة علكتك للعلك كلها اتكييت



11تعودي دايم تقللي الشكوى شيء ما يتغير لا تشكيه لانك تضيعين اجر دنيا ودين ،ترى الشكوى تخليك ملولة دايم ويصير بالك قصير وقعتدك مقرفةوالناس تهرب منك ويمكن تسمعي كلمة اوووووه بس تشكي لان الشكوى مو بس تظهرضعفك وقلة حيلته كمان تظهر عدم نضجك وتحسس الانسان المقابل بالانزعاج والاستياء لانك ضعيفة ومهما قدم لك حلول ما تقتنعي فيها , دائما خلي شكواك استشارة بعيدة عن المناحة الكبيرة قولي كلمة ورد غطاها لو تقدري تدوري الحل بنفسك كان بها لو لااسالي بدون تذمر

مثال صغير: شعرك تساقط
طريقة سليمة :- تبحثي بالاسباب تسالي دكتور ويوصف لك دواء تسالي الصيدلي عنه وكيف يستخدم , تسالي جارتك اللي عالجت فيه
طريقة سيئة: ياربي بصلع شعري فروتي طالعه وزوجي ما يبيني اجل جمبة يقولي احسك عجوز وحمواتي يضحكن بي الخ الخ الخ
( دايم الشكوى في الامور اللي مالها حل ,, ما تلاحظي نفسك تشكي في شيء محتوم يعني لو صبرتي اجرك كبير ، بينما الشيء الصغيرما تشكي منه وهذا سر لكم)


12حياتك عيشيها بالطول والعرض
لما بتموتين محد بيموت بدالك ولما تحيين لا تحين لاحد بدالك
حيياتك لك انتي انتي بعيوبك ومشاكلك بخيرك وشرك بجمالك وسحرك لك انتي
لاتعيشي حياتك على ارضا زوج او ارضاء اخ او صديقة لالا هذي لك
لا تتكدري لانه مادق ما اتصل ما سال ( زوجك طبعا )

زميلتك بالعمل تحاول تغيضك طنشيها وعيشي حياتك لا تتكدري عشان أحد ما يستاهل ترى ان شافوك سعيدة ينغاضو منك وبيزعلون لكن لما تتضايقي يحسون انفسهم أقوياء وكسروكــ



13قلبك لك يا عزيزتي

قفليه بمفتاح ولا تسمحين لاي احد يدخله بدون اذنك
واللي مايعجبك طلعيه من قلبك لانه ما يستاهل طيبة قلبك
ولا تتاسفين عليه
لاني اللي ما يحترم قوانين قلبك ما يحترمك
واللي يتعمد يجرحك مكانه خارجا لقلب



14حددي اهدافك
كلنا لنا اهداف عامة نسولف فيها
بس يبقى لنا اهدافنا الخاصة اللي نحبها ونبيها
المطلوب انك تكتبينهم بورقة ولا تخبرين اياحد عنهم
وتمسكين كل هدف وتبسطينة للخطوات المطلوبة تسوينها منه
مثلا
هدفي ادرس شيء
اشوف اني احتاج تسجيل - مبلغ مالي - مكان مميز يقدم لي الخدمة
وابدااحط الخطوات في الفعل يعني اسويها
مو بس حبر وورق
لازم اسجل كل خطوة كم تبي مني وشكثر تبي
وبعد كل خطوة اشوف شكثر انا حققت منها يعني نصها ربعها اقل أكثر
وبعدها انقل اللي ما سويته للخطوة الجاية
وما يتم ان شاء الله الا خالص
ولما ما تخلصينه لا تزعلين
اجلسي مع نفسك وحددي اسباب فشلك
موضوع السريةفي الاهداف يخفظ لك مصداقيتك وصدق اقوالك قدام الناس وما يحتاج اقول ان الناس مايعطون خير الا من رحم ربي

15كوني قوية
القوة مو بالصراخ والصوت العالي
الانوثة ما تتعارض مع القوة
الصوت العالي والاسلوب الاستفزازي والكلام القبيح ما دل على قوة بالعكس ضعف
تدرون ليش ؟؟؟
لانها من قلت حيلتها وقلت ثقتها بنفسها استخدمت التصريخ والتهويش
عشان تستعين فيها حتى تخفي ضعفها
وشوفي اللي تصرخ دايم تلقينها مسكينة لو جينا للصدق
والهادية الواثقة الرزينة دايم صوتها هادي



16كوني حنونة على ذاتك
ارحممي نفسك
من ذنوبك من معاصيك من كل شيء يذيك حتى السيرة اللي تجيب الهم لا تحكين فيها
المكان اللي يجيب لك ذكريات شينة لا تروحينله
ارحمي ضعفك وقوتك
بطشك وعدلك
حنانك وقسوتك
ارحمي كل حواسك
وقتها بترتقين
استعملي اللي ربي عطاك بالخير
ولا ترهقين تفسك لا فكريا ولا جسديا بشيء يضايقك

ترى الدنيا ما تسوى تعملي في نفسك كذا واكثر


منقووووووول من الخبيره سهى



https://fbcdn-sphotos-d-a.akamaihd.net/hphotos-ak-ash4/482113_236967293114455_1193518507_n.png
موضوع حصري لمنتديات شباب باتنة