فراق الاحباب ( قصة تقطع القلب )

[admin]

موضوع مقدم من منتديات ديزاد
منتديات ديزاد باتنة (http://www.dzbatna.com/vb)
[SIZE=4][COLOR=blue]فراق الاحباب (http://www.dzbatna.com/vb/t5566/) ( قصة تقطع (http://www.dzbatna.com/vb/t5566/) القلب (http://www.dzbatna.com/vb/t5566/) )
السلام عليكم

المكان : الكويت ..

المكان : وحده من عمارات الكويت ..

الزمان : المغرب الساعة 5.30


كانت خلود جالسه قدام دريشتها وفي ايدها صور 2014ة حبيبها محمد وقاعده تغني في اسم محمد .. وهي سرحانه تسمع صوت من دريشة الشقة الي قدامها

جاسم : الله صوتج وايد حلو .. ويفتح الدريشه ولا يطالعها .

خلود : ويعه وانت شكو .. تسمع على بنات خلق الله ..

جاسم : انا اسف انا كنت يم الدريشه ابي افتحها وسمعت صوتج ..

خلود : مو انا كنت متوقعه انا شقه الي قدمنا مافيها احد فاضيه ..

جاسم : أي لانه تونا ساكنين اليوم ..

خلود : زين خلاص لا تطولها .. يالله سكر دريشتك ..

جاسم : وليش تسكرين علي حياتي ..

خلود : شكو دريشه في حياتك ؟؟

جاسم : لانه منها القى ما بقى من حياتي ..

خلود : اوووووه شكلك مينون .. انا ابي اسكر دريشتي وارتاح منك .. وتسكر الدريشه

ويبقى جاسم عند دريشته يطالع السماء وهو سرحان .. وتمت خلود تتابع جاسم من ورا ستارة دريشتها وهو ما يدري عنها وتستغرب جاسم سرحان ولمدة طويلة وهو يطالع السماء وهو جالس يكتب في دفتر كان ما يفارق ايده .. وبعد اربع ايام فتحت خلود الدريشه قصدت منه تهوية الغرفه وفي ايدها الثانيه تليفونها النقال تكلم فيه محمد ..

خلود : محمد شفيك صار لك مده ما تكلمني شنو الي مغيرك علي

محمد : ( بدون نفس ) مافي شي ..(

خلود : شنو مافيه شي انا مزعلتك يا محمد ..

محمد : اوووه تراج اذيتيني وياج ما عندي غيرج يعني !!!

خلود : محمد انت شنو قاعد تقول ؟؟

محمد : اقول خلود انا مشغول مع السلامه ..

خلود : بس محمد .. ويسكر التليفون ويفتح جاسم الدريشه وهو حاط على ظهره بطانيه صوف وبئيده المرتعشه ماسك دفتره ويطالع في السماء ويكتب في دفتره وملامح ويها تبين عليه التعب و خلود ماسكه في ايدها التليفون وايدها الثانية تحت راسها ويالسة تفكر ..

جاسم : يطالع خلود وبصوت ضعيف صباح الخير ..

خلود : تطالعه نعم

جاسم : اسف على الازعاج بس حسيت من المفروض علي اني اصبح على جارتنا ..

خلود : هذا انتم يا الشباب ما تشوفون بنت الا .. ويقاطعها صوت مسج من محمد وتفتحه بسرعه خلود خلاص انسيني انا لقيت غيرج مع السلامه ) وتنصدم خلود من محمد وتحاول تدق عليه ويقاطعها صوت مسج ثاني .. ( خلود تراني عطيت خطي حق ولد خالتي لا تحاولين تدقين علي ومن هول ما شافت يطيح التليفون من ايدها الى ارض العماره ويتكسر .. وتنزل الدمعه من عين خلود وهي ساكته ما تعرف شنو تسوي ؟؟؟

جاسم : عسى ما شر شنو السالفه ؟؟

خلود : بنظرات حقد انتم كلكم نفس بعض الله ياخذكم ويحرقكم مثل ما حرقتوا قلبي

جاسم : بس انا وتسكر دريشة غرفتها بقوه لي درجة انه تكسر زجاج الدريشه

زاد تعب جاسم شوفت خلود جي .. وحس انه يضايقها وعزم انه ما يفتح دريشته لما يشوفها .. علشان ما يضايقها .. وتم على هذا مده مو قصيره .. ومن ناحيه ثانيه كانت خلود حزينه على الي سواه محمد فيها وكانت تفكر وتراج كلامه خافت انه في كلمه قالتها له وضايقته فيها .. بس ما لقت شي ما عمره طلب منها شي غير انه عطته بدون حدود ولا كانت تنطر منه كلمة شكر وكان هو بعد بخيل فيه لها ..

وبعد فتره حست بعدم خروج جاسم و فتحه لدريشته الي كان متعود عليها وكانت تنطره فتره على اقل تتاسف له على سوته علشانه .. بس ما شافته وصارت تنطره عند دريشتها فترات طويله من النهار بس ما طلع ولا اقترب من دريشة ..


وفي يوم كانت مستعجله تبي تلحق على باص المدرس مفصله فتحت دريشتها ولقته توه فاتح دريشته ولما شافها كان يبي يسكرها ..

خلود : لحظه لحظه ..

جاسم : يفتح الدريشه .. هلا ؟

خلود : شوف في كلام ودي اقوله لك بس انا مستعيله الحين اكلمك العصر اوكي الساعه 5 .. يالله مع السلامه لانه باص المدرس مفصله ينطرني تحت

جاسم : ان شاء الله اذا قدرت مع السلامه ..

خلود لا تكفى حاول ..

جاسم : ان شاء الله ..

وتروح خلود لمدرس مفصلتها وتعد الساعات علشان تطلع ولما طلعت تمت في غرفتها تطالع الساعه لين تي الساعه 5 ولما يت ركضت لي دريشتها وفتحتها بس ما شافت جاسم عند الدريشه .. جلست قدام الدريشه تنطر وتمر الدقيقه وراى الدقيقه وتجري الساعه وراى الساعه وينزل ظلام الليل على سماء الكويت وتزيد ظلمة غرفة جاسم ظلمه لين يت الساعه 10 بليل وقالت خلود حق نفسها اكيد هو زعلان ولا منحرج مني ابي اسكر الدريشه وانطره بكره وتسكر دريشتها وتحس بنور من غرفة جاسم وترد وتوخر الستاره عن الدريشه وتشوف ام جاسم تفتح الدريشه ويدخل جاسم لي غرفته على كرسيه المتحرك ويقترب من الدريشه وتحط بطانيه صوف على كتف جاسم وترسم على جبهته قبله من شفات امه وتطلع من الغرفه ويقترب جاسم من الدريشة وعينه الى سماء ويتمتم في كلامات وتنزل من عينه دمعه .. وتفتح خلود الدريشه


خلود : بصوت خفيف قوه

جاسم : ولا يحس فيها ..

خلود : ( تعلي في صوتها قوووه ..

جاسم : يلتفت لها ويمسح ما نزل من خده من دموع .. هلا اسف ما انتبهت عليج .. واعذريني لما تاخرت عليج بس ما كان في ايدي توني جاي ..

خلود : لالا مو مهم اهم شي انك رديت .. بس انت شنو قاعد تقول حق روحك .. اشوف شفاتك تتحرك وتنزل دمعه من عينك ..

جاسم : اقول ابتسم واضحك تره الدنيا حلوه

خلود : الله وايد حلو كلامك ..

جاسم : مشكوره هذا كلام اقص على روحي فيه ..

خلود : وليش تقص على روحك ..

جاسم : مو مهم تعرفين .. ولا ودي اقوله لانه وايد يعذبني ..

خلود : على راحتك وعلى العموم انا كان ودي اتاسف لك على الي صار هذاك اليوم ..

جاسم : يعني انا ما كنت مضايقج ..

خلود : هي مو سالفة مضايقني بس كنت ..

جاسم : كنتي متزاعله مع محمد ..

خلود : لا حنا خلاص افترقنا .. وانا مو متحسفه عليه لانه هو الخسران خسر قلب كان يحبه ..

جاسم : واليوم ..

خلود : اكره .. اكره على كثر ما حبيته .. اكره .. والله اكره
جاسم : لا تحلفين الي يحب ما عمره يكره ..

خلود : والله اكره يا ..

جاسم : جاسم ..

خلود : عاشت الاسامي يا جاسم .. وانا اسمي خلود ..

جاسم : عاشت ايامج .. وعاشت الاسامي يا خلود ..

خلود : تسلم .. خلاص يا جاسم لو سمحت لا تذكرني فيه .. زين ابي اسئلك سؤالين ممكن ؟

جاسم : أي حاضر ..

خلود : انا كل مره اشوف وياك كتاب هذا ماسكه وياك وتقعد تكتب فيه شنو تكتب ؟؟؟

جاسم : اكتب قصص .. هوايه من انا صغير نسيته فتره ورديت لها من سنتين ..

خلود : وشنو تكتب وليش رديت للكتابة ؟؟

جاسم : اكتب اشياء وايد كل شي يخطر على بالي ... ورديت له من سنتين بسبب مرضي ..

خلود : سؤال ثاني ودي اقوله لك بس مستحيه ..

جاسم : لا قولي لا تخشين شي في قلبج ..

خلود : انت من متى على ..

جاسم : على الكرسي .. انتي شفتيني ..

خلود : أي مو انا كنت انطر ولما صكيت دريشتي امك دشت غرفتك وانت دشيت وراها وشفتك ..

جاسم : انا قبل ما كان فيني شي لين سنتين حاشني مرض قعدني على الكرسي هذا ما اقدر امشي منه الا بصعوبه ..

خلود : الله يشفيك ان شاء الله ..

جاسم : ان شاء الله ..

خلود : ممكن اشوف الي انت تكتبه ..

جاسم : أي حاظر بس لحظه ابي اسمي كتابي .. وكتب عليه اسم ( فاقد الشي لا يعطيه) زين شلون اعطيك ايها ..

خلود : حنا قريبين يم بعض حذفه علي وانا امسكه ..

جاسم : اخاف ما يوصل لج ..

خلود : ما عليك انت حذفه وانا امسكه ..

ويحذفه جاسم الكتاب على خلود وتمسكه في ايدينها الثنتين وتضمه على صدرها ..

جاسم : اشوفه وصل لج ..

خلود : حمدالله والله كنت خايفه اني ما امسكه ..

جاسم : عيل اخليج تقرينه لاني لزم اخذ دواي وانام الحين وبكره عندي مراجعه في المستشفى

خلود : طمني عليك .. وانا ابي اسهر عليه ..

جاسم اوكي خلاص عيل تصبحين على خير

خلود : تلقى كل خير في ويهك ..

جاسم : هذه يديده ..

خلود : أي هذه علشانك بس ويحمر خدها خجل وتسكر الدريشه وتجلس على طرف سريرها وتفتح الكتاب واستغربت من عنوان فاقد الشي لا يعطيه ..

وافتحت الكتاب ومن اول سطر لقت روحها تمشي ورا الصفحات صفحه وراى صفحه وقصه ورا قصه ودموع من غير شعور تنزل من عينها وعلى خدها تجري ..

لين ما طلع الصبح ولقت روحها انتهت من اخر قصه وهي تنصدم من روحها لانها تاثرت وايد في القصص ولا توقعت انها راح تبجي هالكثر .. كل القصص نهايتها حزينه ..

وحست من عنوان الكتاب انه قصد منه ان جاسم فاقد الفرحه ولا قدر يعطيها لي ابطال القصه الي يكتبها .. وحست بشعور انه انسان وايد طيب وحساس ومرضه اثر عليه وايد .. وغيرت ملابسها وراحت لمدرس مفصلتها .. ولما ردت من المدرس مفصله وهي نعسانه ودها تنام قالت حق روحها خلني اشوف جاسم رد ولا لين الحين .. وفتحت الدريشه

وشافت جاسم ينطرها ..

جاسم : انا حاس كنتي تبين تفتحين الدريشه الحين ..

خلود : وانت شنو دراك ؟؟

جاسم : احساس ..

خلود : تدري انك مسهرني من امس ما نمت تميت اقرا القصص كله ولا خليت ولا سطر .. كلامك وايد حلو ومشاعرك صادقه .. ماشاء الله عليك والله موهوب ..

جاسم : لا شدعوا هي مجرد قصص اكتبها القصد منها تضيعت الوقت

خلود : جاسم عمرك حبيت ؟؟؟

جاسم : أي حبيبت نوره . وزينب . وريم . وبعد حبيت سميره . وعشقت سعاد مثل ما عشقت مريم .

خلود : بس هذيل ابطال قصتك !!

جاسم : انتي ما لحظتي بكل القصص اسم بطل واحد ..

خلود : قصدك طارق .. أي صح ..

جاسم : انا حبيت هذيل كلهم وعشت في طارق تصدقين كان ودي انهي كل قصه في شي سعيد بس ما اقدر امنح السعاده وانا بنفسي فاقدها ..

خلود : بس يا جاسم ..

جاسم : لا بس ولا شي لا تحاولين تقنعيني ..

خلود : ما ادري شنو اقولك .. بس انا اخليك الحين واشوفك بالليل لاني وايد نعسانه ..

جاسم : على خير

خلود : تصك الدريشه وترد تفتحها بسرعه .. جاسم جاسم

جاسم : يفتح الدريشه .. نعم

خلود : نسيت اسئلك شنو سويت في المستشفى ؟؟

جاسم : ما سويت شي فحصوني مثل كل مره وصفوني مسكنات وقالوا راجعنا بعد شهر ..

خلود : بالشفا ان شالله ..

جاسم : ان شاء الله ..

خلود : نشوفك بالليل مع السلامه

جاسم مع السلامه ..


وتقوم خلود الساعه 9 ونص بالليل وتركض لين دريشتها وتفتحها ولا تشوف جاسم قدامها ينطرها ..

خلود : من متى انت هني ؟؟

جاسم : انا هني من اول ما خليتني ..

خلود : شنووو

جاسم : أي والله تميت عند الدريشه من اول ما خليتيني .. انطرج ..

خلود : بينها وبين نفسها ( يا بعد عمري ( ما ادري شنو اقولك ..

جاسم : لا تقولين شي كلميني عن روحج انا لين الحين ما اعرف عنج شي






خلود : انا يا جاسم انسانه مثل أي انسانه في الدنيا حبيت واحد لكن للاسف طلع خاين ..


موضوع مقدم من منتديات ديزاد
منتديات ديزاد باتنة (http://www.dzbatna.com/vb)



https://fbcdn-sphotos-d-a.akamaihd.net/hphotos-ak-ash4/482113_236967293114455_1193518507_n.png (http://www.dzbatna.com/vb)
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى (http://www.dzbatna.com/vb)©