السلام عليكمورحمة الله وبركاته
بمناسبة حلول عيد الاضحى المبارك ونزولا عند طلباتكم افيدكم اليوم بوصفة (جزائرية) المقروط المقلي

المقادير
الكيلة اللي استعملتها هي علبة المرغرين نتاع رطل

كيلتين سميد احرش يعني دشيشة نتاع مقروط + كيلة فرينة + ملعقتين كبيرتين جلجلان محمص ومرحي + ملح وشوبة خميرة كيميائية



كيلة ناقصة شوي مرغرين ذايبة وباردة استعلت لابال



نسكب المرغرين وسط المكونات السابقة بعد ما نخلطها مع بعض



نحك بالايدي مليح



نلم بماء زهر بالاصابع ثم نرطب العجينة باستعال كف اليد ولازم تكون طرية لانها راح تنشف بعد ما تريح






نغطيها بكيس نايلون ونخليها ترتاح 20 د



في هذه الاثناء نحضر الغرس بالطريقة المعتادة ونشكله حرابيش رقيقة بسمك قلم الرصاص



نبدا العمل نفرش نايلون ونحط العجينة ونغطيها بنايلون ونحلها رقيقة حوالي 2ملم



نقص بالسكين الحاشية ونحط حربوش الغرس



باستعمال النايلون نلف لفة ونغلق مليح



ونزيد اللفة الثانية ونقطع العجينة بالسكين



بالاستعانة بالنايلون دائما نملس سطح العجين ونممد فيه اذا كان الحربوش غليظ



نواصل العملية بنفس الطريقة حتى ننتهي من العجينة





نقطع الحبات على شكل سيقار هكذا



ثم ننقشها



انتهينا من العملية ولازم الحبات يكونوا مغطيين باه ما ينشفوش وما تتشققش العجينة






نقلي المقروط في زيت غزير بلا ما نقلب الحبة يعني تطيب من تحت ومن فوق في نفس الوقت



نخرجها لما تكتسب اللون الوردي



نخليه يبرد مليح ثم نخبيه في بورت مونجي



التعسيل يكون عند التقديم
لازم العسل يكون دافي وثقيل نوعاما مثل نتاع الزلابية مش شاربات



نرش بالجلجلان ويقدم







اتمنى الوصفة (جزائرية) تكون نالت اعجابكم
وانتظر تطبيقاتكم
دمتم في رعاية الله وعيدكم مبارك وكل عام وانتم بالف خير
والسلام عليكم ورحمة الله وبركاته




©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©