السلام عليكم ان شاء الله الكل راه بخير


بمناسبة قدوم شهر رمضان المبارك نتمنى ان يتقبل الله صيامنا و يغفر لنا ذنوبنا و يجعلنا من اهل الجنة



طبعا في هذا الشهر الكريم يكثر اقبال الناس على شراء الحلويات المعسلة مثل الزلابية و قلب اللوز و قريوش ......الخ



لذا اليوم حبيت نمدلكم طريقة عمل القلب اللوز و هي ناجحة 100 بالمئة



فتحضير قلب اللوز ليس صعب لكن فيه تقنيات في طريقة العمل لازم نتبعها خطوة بخطوة



بدون اطالة نبدا على بركة الله


المقادير :
-1/ للعجينة :
- 1 كلغ سميد حرش
- 500 غ سكر مغربل
- 200 غ زبدة ذائبة او سمن و تكون باردة شوية اي دافئة ( انا استعملت السمن)
-1/2 كاس ماء زهر
- تقريبا كاس ماء بارد
- رشة قرفة بودرة
للشاربات :
-500 غ سكر عادي
- 1 ل ماء
- فنجان ماء زهر
الحشو :
-3 كيسان كاوكاو مطحون او لوز
التحضير :
- اول خطوة لازم نحضر الشاربات ندي كسرونة ندير فيها سكر + ماء و نوضعها فوق نار من التعليم المتوسطة و نحرك شوية باش سكر يذوب و مايلسقش
- من بعد كي نشوف بلي سيرو بدا يغلي نحسب 15 د من بداية الغليان و نطفي عليه و نخليه في مكان عادي حتى يبرد شوية اي يدفا
- من بعد نضيف ليه فنجان نتاع الماء زهر و نخليه على جنب
- ثاني خطوة نروح لتحضير العجينة ندي قصعة من التعليم المتوسطة ندير فيها سميد + سكر و نخلط الكل مدة 5 دقائق باش سكر يدخل في سميد و مايوليش يبان
- من بعد 5 د نبدا نضيف في زبدة ولا سمن بالتدريج و نخلط مانعجنش كي شغل رانا نحضرو في كسكس و نخلط مدة 5 الى 10د باش ينسجم الخليط مليح
- نخليها ترتاح مدة 20 دقيقة
- بعد هذه المدة نرشها بالماء الزهر بالشوية حتى تتخلط العجينة
- نبيتها ليلة كاملة اونخليها في الثلاجة مدة ساعه كاملة طبعا نغطي العجينة
- في اليوم الموالي نخلط العجينة بيدينا نلقاوها نشفت شوية من سطح نخلطها و نذكر دايما لازم مانعجنش لازم العجينة تكون مثل الرمل اي مثل الكسكس
- نرشها بالماء البارد حتى تصبح العجينة طرية( مانكثرش الماء حتى تتعجن رش الماء يكون بالتدريج و نتحسس من العجينة)
- نضيف القرفة الى الخليط و نخلط ¼ مغرف قهوة


- ندي سنيوة قطرها 36 الى 40 سم تكون مدهونة مليح بالزبدة و نقسم الخليط الى 2 نفرغ الاول مانضغطش عليه ندير الكاوكاو او اللوز و نزيد نضيف الخليط 2 بلا مانضغط على العجينة
- ناخذ سكين نقطع العجينة على الطول و لكن على العرض نرسم المربعات مانقطعهاش

- نزين بحبات لوز او الكاوكاو و نتركها ترتاح مدة 10 د قبل ماندخلها الفرن
- الفرن يكون سخن 20 د من قبل ندخل القلب اللوز على نار هادئةبلا ماندهن السطح
- كي نشوف بلي بدا ياخذ اللون الوردي مع الجوانب الصينية نخرجوه من الفرن و مباشرة ندهن وجهه بالسمن او زبدة ذائبة
- نعاود ندخلوه للفرن و نخليه يكسب اللون ذهبي
- كي يجهز نطفي الفرن و نخرجومن بعد مباشرة نسقيه بالشاربات اللي كنت حضرتها من قبل لكن مانسقيهاش كلها نخلي كاس منها
- نعاود ندخلو الفرن يكون مطفي و نخليه يشرب السيرو ديالو مدة 10 د من بعد نعاود نخرجو ونسقيه بالكمية متبقية و نعاود نخليه في الفرن مدة 10د







- بالصحة و الهنا عليكم و شهر رمضان مبارك للجميع





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©