صباح الخير اخواتي نظرا لطلبات بعض الاخوات حبيت نفيدكم بنوع من الباتيسيري المسقي يشبه شوية لي كوبلي روايال لكني عملتو في ليكيسات من باب التغيير ومن مجهودي الخاص وزيد غير مكلف واسهل منو مافيش ويعمل كمية لاباس بيها

اولا تحضري مسكوتة كيما اللي عودتكم بيها اعتقد اسهل منها مافيش وزيد اقتصادية
في صحن حطي زوج بيضات مع قرصة ملح وشوية فاني ونصف كاس سكر

خلطي مليح مليح حتى يتصاعف الخليط ويبياض زيديلو نصف كاس زيت وخلطي مليح

زيديلو كاس ونصف فرينة مغربلو مع وحدة ونصف خميرة الحلوى خلطي بالملعقة تتحصلي على خليك ثقيل
زيديلو نصف كاس ماء دافي ماشي بارد وخلطي


صبيه في مول مدهون بالزبدة ومغلف بالفرينة ودخليه على 220مش اكثر حتى يطيب

وكي يبرد فتتيه بيدك واعمليه قطع من التعليم المتوسطة


التجهيز
جهزي لي كيسات نتاع ليمادلان من النوع الكبير كيما نتاع الباتيسري
حطي كمية من المسكوتة


حطي فوقها ملعقة من الكرام باتيسيار اللي تكوني حضرتيها وخليتيها تبرد اعمليها حسب دوقك انا عملتها فراز


زيدي حطي طبقة من المسكوتة حتى تتغطى لاكرام باتيسيار


اسقي الكل بزوج ملاعق صغيرة او مغرف كبيرة من اي عصير تحبيه انا عملت عصير البرتقال لانو وقتو ومفيد وغني بالفيتامين سي
زيني بوردات من الشانتيي انا عملتها بنكهة الفراز
وفي الوسط حطي شريحنين من البرتقال كيما العصير وزيني بلاجولي والبراق الغدائي الفصي
دخليهم الثلاجة ساعتين او اكثر وقدميهم باردين اممممممممممممم روعة





ملاحظة اللي ماتحبش البرتقال تستعمل اي فاكهة تحبها

الكمية هادي عملتلي 17 حبة باتيسري
هاد النوع من الباتيسري يتاكل بالملعقة او المغيرفة لانو من النوع المسقي

راني نستنى رايكم وتقييماتكم وبلا ماننسى تطبيقاتكم راهو ساهل ماهل وبنيييييييييييييي يييييييين والمهم انو مايكلفش





©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©