سلام عليكم اخواتي هادي اول مشاركة ليا في المنتدى

المقادير
كيلتن فرينة -كيلة سميد - ملعقةصغيرة خميرة حلوة - شوي ملح -نص كوب سمن -كوب حليب سائل-سكرارطب باش نمرمد بيه الاصابع
الحشو
غرس -جلجلانية تحبي تزيدي كاوكاو مرحي الحشو كيما نتاع المقروض عادي

الطريقة
نحط في صحن السميد والفرينة والخميرة وشوي ملح ونخلطهم مليح ومن مباعد نفركهم بنص كاس سمن ونعجن الخليط بالحليب حتى تصير عندك عجينة لينة خلي العجينة ترتاح لمدة عشر دقائق ومن مباعد افرديها واطبعيها بكاس يكون شوية فتحة نتاعو كبيرة يعني على شكل دائرة وكذلك الغرس اي الحشو نفس الطريقة العجينة او تحبي تفردي العجينة مع الغرس فوق بعضاهم ومن مباعد تطبعيهم بالكاس على شكل داءرة تكون لعجينة نحت تحت والغرس من فوق ومن مباعد تروليهم على شكل اصابع تكون من جانب اصبع على شكل حلزون وبعد ما تكملي تسخني الزيت وتقليهم ومن جهة تحطي سكر ارطب في سنية وبعد ما يطيبو الاصابع وياخدو لون ذهبي وتخرجيهم من مقلاة تحطيهم في سكر ارطب وتمرمديهم .
تحبي تديري اصابع طوال وتقسميهم على زوج باش تبان شكل الحلزون على الجوانب

وفي الاخير بصحة والهناء وان شاء الله تعجبكم




©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©