السلام عليكم و رحمة الله و بركاته
بسم الله
اللي ما تعرفش الدرع (البشنة) و الا تحب وصفات جزائرية أخرى للدرع تشوف موضوعي :
http://www.dzbatna.info/vb/showthread.php?t=930179
المقادير 1 : 1 ك ماء, 1 ك سكر , 1 ك حليب غبرة, 1 ك زيت ناقص شوية
المقادير 2 : 2 ك دقيق درع , 1 م ك خميرة قاطو
اختياري : تمر طري أو تمر مرحي , مكسرات و جلجلان للزينة.
الطريقة : تحطي المقادير الاولى في خلاط العصير حتى يتجانس الخليط.
ثم تصبيها فوق المقادير الثانية (الدرع تكوني غربلتيه مرة أو أكثر و خلطتيه مع الخميرة الكيميائية) و خلطيها بالخلاطة اليدوية حتى يصير المزيج متجانس لكن خاثر أكثر شوية من الخليط العادي للكيك.
حضري الطبق اللي باش تدخليه للفرن : ادهنيه بالزبدة و رشيه بدقيق الدرع.
صبي نصف الكمية و حطي فوقها التمر (حليه بصوابعك و حاولي يكون مثل الورقة الغليضة و غطي بهذه القطع النصف الاول من الكيكة)
صبي النصف الثاني من الكمية برفق و استوي السطح من فوق (بلي ايديك بماء عادي أو ماء زهر و استوي الكيكة)
اللي ما عندهاش تمر تقدر تستغنى عليه
زينيها من فوق بالمكسرات اللي عندك (تكون نية باش ما تحمارش بسرعة) و رشيها بالجلجلان.
في هذا الوقت تكوني سخنتي الفرن 180 درجة , دخلي الطبق للفرن حطي النار من تحت و اول ما تعلى الكيكة طفي من تحت و شعلي من فوق (هذه النصيحة نسبية لأن كل واحدة و الفرن متاعها)
سامحوني اني ما صورتش المراحل في أقرب فرصة نعاودها و نحطلكم الصور للتوضيح أكثر , حاليا عندي كان صورها و هي حاضرة :
و
من داخل مع ان الصورة ظالمتها شوية :
ان شاء الله تعجبكم. جربوها و ما تندموش راهي خفيفة و مفيدة.
ملاحظة : الوصفة (جزائرية) هذه تعلمتها من النت خاطر نسيت وصفة (جزائرية) أمي ربي يفضلهالي (كي نرجعلها نجيبلكم وصفتها الاصلية) و ان شاء الله المرة القادمة نجيب وصفة (جزائرية) أخرى لكيكة الدرع بالبيض و الزبيب و المكسرات و التمر , انتظروني .
©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©