السلام عليكم أخواتي

عملت ترافل بالنواد كوكو عجبني شكلهم و ذوقهم حبيت نشاركم بيهم نتمنى يعجبوكم و تجربوهم


المقادير

250 غ فرينة
75 غ زبدة ذايبة و باردة
ملح و ماء و ماء زهر
ملون أخضر و ملون وردي غامق

600 غ نواد كوكو
300 غ سكر ناعم
مبشور حبة ليمون كبيرة
فانيلا
3 ملاعق كبار عصير ليمون
2 بيض أو أكثر
عسل مخفف بماء زهر
حبيبات صغار للزينة DES PERLES
لماع غذائي فضي اللون

ملاحظة : الأصل في الحلوى هدي انها تتعمل باللوز مكان النواد كوكو

يعني 3 كيلات لوز مرحي مع كيلة سكر أرطب و فاني و ممكن عطر اللوز و تلمي بالبيض

و الأصل فيها أيضا تتعمل بالألوان مثلاكرية بلون وردي و كرية بلون أصفر و كرية بلون أخضر

عن نفسي أفضل الطريقة هدي لي خدمت بيها هنا و تبقى مسألة أذواق
 الطريقة

ضعي الفرينة الزبدة الذايبة و الباردة و الفاني و لمي بالماء مخلط مع ماء زهر و مذوب فيه شوية ملح
نحي شوية خلطي معاه ملون اخضر مذوب في الماء
و شوية ذوبي فيه الملون الوردي مذوب في الماء أيضا
اتركيها ترتاح ليلة كاملة
في الغد حليها بالقراص ثم في آلة ترقيق العجين على رقم 5 ثم على رقم 7
قصي مثلث من الورق المقوى " أنا استعملت ورقة عادية" و قصي بيه مثلثات من العجينة بواسطة الجرارة

_ بالنسبة للحشو لمي النواد كوكو و السكر و الليمون و المبشور و الفاني و البيض تولي عجينة اعملي منها كويرات صغارو حاولي يكونو كل حجم واحد

ملاحظة : العجينة و كريات الحشوة لاااااااااازم يبقاو مغطيين بسرفيات و الا رح يشيحو و ميصلحوش خاصة العجينة


ضعي المثلث تاع العجين فوقه 3 كريات من الحشو بنفس الترتيب المبين في الصورة


ثم الزوائد تاع العجينة طلعيهم فوق كريات النواد كوكو



أعملي من العجينة الخضرا ورقات بواسطة الطابع تاع الورقة " أكبر واحد في المجموعة"



و أعملي بالطابع رقم 4 وردة



تقصي بيه العجينة تتحصلي على دائرة مشرشفة تطويها على 2 و تزيدي تطويها على 2 و رققي أسفلها تتحصلي على وردة جميلة






بواسطة بيباض البيض لسقي الورقات على جنب و في الوسط ضعي الوردة دخليها بواسطة كيردون

في ثنايا الوردة ضعي لي باغل الصغار حطي 4 أو 5 لأنك لو حطيتيهم بعد ما يطيبو رح يطيحو

دخليهم فرن مسبق التسخين على نار هادئة لمدة مش طويلة مجرد ياخدو اللون الوردي من تحت و زيدي شعلي عليهم من فوق يشيحو فقط يخرجو بيض

كي يبردو عسليهم مرتين أو أكثر في عسل سخون مخفف بماء زهر

خليهم يسقطرو في كسكاس ثم ضعيهم في حاويات ورقية و رشي عليهم ملمع غذائي

الطعم ممتاز و الشكل والله في الواقع أحلى من الصور

نتمنى يعجبوكم و تدعولي بالشفااااااااااااااااااااااااااااااااء العاجل



للأمانة الوصفة (جزائرية) هادي لقيتها في مدونة سيدة جزائرية طبقتها هكذا بحذافيرها غير هي عملت 3 ورقات خضر أنا فضلت نعمل 2 فقط




©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©