جبتلكم اليوم كسرة رخسيس أو كيما يسميوها البعض الفطير باش يتعلمو المبتدئات وراح نعتلكم طريقتي في تحضيرها مع المقادير طبعا



أنا كيلت بهذا الكاس

3 كيسان سميد
2 ملاعق صغيرة ملح
ملعقة صغيرة سكر
ملعقة صغيرة خميرة الخبز
شوي جلجلان انا درت ملعقة صغيرة واذا حبيتي نقصي لكن تجي بنينة بالجلجلان
نصف كأس زيت
ماء دافي باش تلمي بيه العجين الماء مقدرتش نتي والسميد لي عندك


حطي المكونات الجافة + الزيت وبسسيه حكيه شوي بيديك حتى يولي مرمل كيما في الصورة


الان لميه بالماء الدافي ، الدافي وماشي سخون لميه ودخليه في بعضاه بيديك الاثنين ذهاب واياب لكل يد ومتنسايش تلمي العجين يلي على القصعة متخليش العجين لاصق على اطرافها هاذ الخدمة يديروها الفنيانات ههههههههههه


بعد مايكون تلم العجين مع اضافة الماء تدريجيا حتان يتماسك ومايكونش يابس كي تقيسيه بصبعك يكون طري وغطيه بكيس بلاستيكي وفوقو منشفة متكونش خشينة وخليه يرتاح 20 د وشعلي الطابونة وحطي الطاجين يسخن مليح


الان بعد ما يكون العجين رتاح زيدي أعجنيه غير شوي برك غير يزيد يحكم روحو وديريه كويرات كبار هاذي الكمية تجيك 2 قرص ملاح وحلي العجينة بالحلال وثقبيها بالشوكة وحطيها طيب ولكن كي تحلي القرصة



طيبها مباشرة متقرصيش وتخليها تستنا على خاتر تجي مشلفطة في الطياب
وهاهو بعد الطياب



انشاء الله نكون أفدتكم وتجربوه البنة هايلة يبان قاطو



اللهم صلي وسلم وبارك على سيدنا محمد




©المشاركات المنشورة تعبر عن وجهة نظر صاحبها فقط، ولا تُعبّر بأي شكل من الأشكال عن وجهة نظر إدارة المنتدى©